多士焗爐煮大餐: 西京燒三文魚扒

插播一個人認為好味(&有potential做30分鐘開飯系列主角之一)嘅食譜~

真係好好味!!!!
魚肉好滑、一D都唔嚡!

材料:
三文魚扒  1塊(中size)
赤麵豉  2大匙

味醂  1.5大匙

紹興酒  1蓋

糖  3小匙

水  1.5大匙

做法:
1. 將全部醃料撈勻，試味(會略鹹，醃一晚剛好)
2. 三文魚扒用(1)醃一晚
3. 入焗爐前先抹走醃料，然後用160度焗15分鐘即成!

夏日之料理: 一口醉鮑魚

啱啱嗰個星期好少煮
趁星期六煮返夠本~ 

材料:
鮮(迷你)鮑魚仔  $140/19隻
醉雞汁  (蓋過全部鮑魚仔，約半支)
花雕酒  3蓋
玫瑰露  幾滴(太多會苦)
杞子  1小匙(用凍滾水清洗)
指天椒  半隻(剪碎)

做法: 
1.  鮑魚仔連殼、凍水放入煲內大火煮至滾即撈起，待稍涼起殼用牙刷刷乾淨
2.  鮑魚仔放入玻璃兜，倒入醉雞汁至蓋過全部鮑魚仔，再加入花雕酒+玫瑰露+杞子+指天椒，雪半日即成~

LA ROSE 玫瑰鍋之料理: 牛油珍寶帶子意粉

自己一個晚飯

真係好大動機出面求其食

為免自己有借口

尋晚我好大決心咁攞左兩隻珍寶帶子出嚟解凍

Make sure自己一定要喺屋企食!

談唔上食譜

極其量作個記錄~

材料:

珍寶帶子  2隻

Fettuccine  60g (我買開"delverde"呢個牌子，一包4份，今次用左1份)

蒜頭  2瓣(切碎)

指天椒  半隻(切碎)

牛油  少量

蒜鹽  適量

做法:

1.  帶子解凍洗淨去腸，用廚紙抹乾，用少少海鹽/蒜鹽＆黑胡椒碎醃15分鐘。另一邊準備蒜粒＆指天椒

2.  㷛滾水加少少鹽＆油、跟包裝指示煮熟意粉(唔洗過冷河，但要較啱時間拎去炒)

3.  同一時間用中小火熱溶牛油，兩面煎香帶子盛起(帶子本身熟左，所以略煎兩面至金黃色即可)

4.  原鍋加少少油爆香蒜粒＆指天椒，加入剛煮好嘅意粉兜炒，加蒜鹽調味拌勻即成

LA ROSE 玫瑰鍋之料理: 陳皮蒸鮑魚

沙田街市d海鮮唔錯㗎~

噚日老公想食蜆

去到魚檔見到鮑魚仔$50一碟

都有手心高

揀左一碟6隻

返到等到煮前都仲好生猛

材料:

鮑魚仔  6隻

陳皮  1㸤

做法: 

1.  陳皮浸軟用刀背刮去囊，切絲備用

2.  用牙刷刷乾淨鮑魚，放于蒸碟上，再舖上陳皮絲，每隻均勻落少少生抽(因為我懶，唔想另外開鑊熱油)，滾水大火蒸6分鐘即成~

多士焗爐煮大餐: 蒜鹽焗三文魚扒

通常我諗唔到煮咩 

又或者預計會遲返

就會焗魚~

有時整鯖魚

有時三文魚

所以雪柜長備急凍魚扒 :)

材料:

三文魚扒  1塊

海鹽  適量

黑胡椒碎  適量

橄欖油  適量

蒜鹽  適量

做法:

1.  三文魚扒解凍洗淨抹乾

2.  海鹽+黑胡椒碎+橄欖油搽勻三文魚扒，最後於面滲一層薄薄蒜鹽，靜罝15分鐘(可略)

3.  用180度焗10分鐘即成 (如果魚扒較厚可以2分鐘為單位焗多一陣)

多士焗爐煮大餐: 黑松露香草三文魚

本來噚晚喺屋企食
但臨時有事要喺出面食
雪柜內已解凍嘅三文魚扒唯有急急醃左先
做今日嘅午餐~

材料:
三文魚扒  1件 (一節手指厚)
蒜鹽  適量 (以搽勻兩面為準)
黑胡椒碎  每面約半小匙 
橄欖油  適量 (以搽勻兩面為準)
黑松露醬 (後落!!)  適量 (個人口味，可略)

做法:
1.  三文魚扒解凍洗淨，用廚紙抹乾
2.  用蒜鹽+黑胡椒碎+橄欖油搽勻兩面，鋪好保鮮紙入雪柜醃一晚
3.  200度預熱焗爐。取出醃好嘅三文魚扒放上已鋪錫紙焗盤，面頭搽層薄薄黑松露醬，用180度焗12分鐘 (或視乎焗爐型號) 

註:
出嚟魚肉剛好全熟但又唔會嚡 
我用急凍三文魚扒所以唔敢整半生熟
如用刺身級數可試早三分鐘出爐~

LA ROSE 玫瑰鍋之料理: 忌廉白酒青口

原來我已經好耐無煮過呢樣
就趁住今晚煮嚟同老公慶祝結婚13個月~

材料:

藍青口  1.4kg (from CitySuper $270)
牛油  10g
洋蔥(切碎)  1/4個
蒜頭(切碎)  4瓣

白酒  2.5 cup 

滾水  0.5 cup
(白酒+水蓋過8成青口為準~ 如果唔鍾意太重酒味，可自行調較酒:水比例!!)

淡忌廉  ~150ml

parsley  飾面 

做法:

1.  藍青口用清水沖洗備用

2.  用牛油起鍋，爆香洋蔥蒜頭

3.  轉中大火放入藍青口，加入白酒&滾水，閂蓋煮2分鐘，開蓋，兜勻青口，閂蓋煮多2分鐘，再兜勻。

4.  青口一開口即表示熟。熄火，圍圈倒入淡忌廉，灑上parsley飾面即成~


註:
可以買隻靚少少嘅白酒，因為呢道菜嘅酒味都幾突出。但一定唔好買甜嘅白酒!!!!!

另外
忌廉唔可以煮滾
否則會起粒粒

LA ROSE 玫瑰鍋之料理: 金銀蒜蒸扇貝

我好鐘意食蒸扇貝~
出面食$25隻
唔想俾"燈油火蠟"
咪試下自己煮囉~ :)

(原食譜: 出面餐廳+街市魚檔 XDD)

材料:

扇貝  4隻 
蒜頭(切成蓉)  8瓣 (分兩份)

粉絲  1包

做法:

1. 可請魚檔代開殼&簡單清洗。返到屋企放雪柜普通格，食前仔細清洗。
2. 粉絲用暖水浸軟(~10分鐘)，切段(分4份)。
3. 一半蒜蓉用2大匙油炒至微黃色，盛起備用。
4. 蒸碟上依次放好扇貝、粉絲、蒜蓉(生&熟)
5. 中大火蒸7分鐘 (或跟魚檔指示，因為扇貝有大有細)

LA ROSE 玫瑰鍋之料理: 凍食泰式鮑魚 (超簡易版)

好耐都無寫BLOG喇。。。
要好好努力
追返個進度先~

(原食譜來自FACEBOOK。。)

材料:

鮑魚仔 10隻 (細SIZE, 我買左$120。。)

蔥 2棵

薑 4片

醬汁:

芫茜(切碎)  適量

蒜頭(切碎)  5瓣

青檸  2個

蠔油  2湯匙

糖  2-3小匙

魚露  2小匙

水  2大匙

做法:

1. (可請魚檔代起殼。但返到屋企要即刻煮。) 清洗好鮑魚，煲滾水放入鮑魚仔+蔥+薑煮2分鐘 (或跟魚檔指示，因為鮑魚仔有大有細)
最近我改左做法:
1. 返嚟唔洗洗，凍水落鮑魚，開中大火煲，一滾起即閂火撈起，待稍涼後先至慢慢洗~

2. 調好醬汁至合味。一定要試啱自己口味，因為我都用左比原食譜多兩倍嘅份量。

3. 鮑魚仔+醬汁撈勻，放入雪櫃雪起碼一晚至入味。

4. 最好三日內食完。

我發覺

海鮮真係好易煮

又好味~ 

LA ROSE 玫瑰鍋之料理: 西芹炒蝦球

星期日嘅海鮮餐嘅第三個餸
想煮好耐
但一直無機會 :)

(原食譜: http://columns.etnet.hk/column/index.php/life/homecooking/21003)

材料:

西芹  1扎 ($13)

急凍蝦  10隻

腰果  ~10粒

做法 :

準備功夫:

1.  急凍蝦解凍去腸，洗淨、瀝乾，用少少蒜鹽、黑胡椒碎&蒜蓉醃起碼15分鐘

2.  西芹略沖洗，可適量批/刨走外層嘅"筋"，然後切細條。滾水加入西芹，用少少糖、鹽&油汆水2分鐘至水再滾起，盛起備用

3.  腰果略沖洗、瀝乾備用

開始煮:

4.  用1大匙油燒熱鍋，先略炒腰果 (~1分鐘)，盛起備用

5.  原鍋加入蝦仁快炒至8成熟(變成橙色)，盛起備用

6.  原鍋加入西芹略炒 (~1分鐘)，落適量蒜鹽調味
7.  加入腰果&蝦仁炒勻即成~

LA ROSE 玫瑰鍋之料理: 清酒煮蜆

星期日嘅海鮮餐仲有呢個<清酒煮蜆>
洗+煮唔洗5分鐘!
方便，又出得大場面 XDD

見過奶奶親身示範兩次
今次就試下自己煮 :)

材料:
大蜆  1斤(街市買已吐沙嗰D。一斤$28，呢度$30~)
薑  3片(切條)
清酒(或料理酒/紹興酒)  1大匙
玫瑰露  半蓋 (通常是旦一樣，但我想酒味重D所以兩樣都落)

做法:
1.  蜆買返嚟放雪柜普通格，食前先略沖洗
2.  白鑊落蜆，加薑加清酒(and/or半蓋玫瑰露)，閂蓋中大火煮至開口即可


注意:
1.  為左食到蜆嘅鮮味，越少調味越好。所以完全唔洗加鹽 / 油
2.  蜆本身會出好多水，所以一滴水都唔駛加 (係千祈唔好加)!! 

Le Creuset之料理: 冬菇炆鮮鮑

我好想廚藝有長進
所以特登行書局睇下有無實用嘅食譜

星期六見到本<陳家廚房 - 最愛香港菜>
覺得裡面嘅食譜都HANDLE到
所以買嚟練習練習 :)

(BUT。。。以下煮法有好多"臨場"元素 XDDD)

材料:
鮮鮑魚  4大隻
冬菇  8隻
薑  3片
乾蔥  10粒 (去衣)
料理酒  1大匙
醬油  半大匙
蠔油  1大匙
糖  1小匙
生粉  半大匙
蔥白  3條 (切段)


做法:
1.  冬菇用清水浸軟，去蒂備用
2.  鮑魚可請魚檔幫忙起肉。返到屋企用清水略洗，滾水落鮑魚烚1分鐘，撈起，除去內臟，擦洗乾淨，瀝乾，"界"花備用
3.  用1大匙油中火起鍋(鍋放導熱板上)。油熱落乾蔥&薑爆香，灒酒 
4.  加入冬菇，然後落醬油、蠔油、糖拌勻，再加入~60ml水煮起，轉小火煮至理想杰度 
5.  閂蓋轉最小火焗煮20-30分鐘至冬菇軟身 (今次30分鐘)
6.  鮑魚撲上薄薄一層生粉，用另一隻鑊略煎兩面
7.  開蓋加入鮑魚+蔥白拌勻，最小火煮5分鐘，之後熄火閂蓋焗。食前REHEAT即可~


***鮑魚唔可以煮太耐，會好"UN"。原食譜D鮑魚只煮共3分鐘，但我想海鮮煮熟D好D~ 

多士焗爐煮大餐: 蒜香黑椒三文魚骨

有一次喺奶奶度食過呢個餸
覺得簡單又好味

最重要係佢可以喺30分鐘內完成(最近俾自己一個挑戰，每晚30分鐘內開飯~)
上星期喺百佳買左一PACK三文魚骨 (註: 質素過得去啦。。)
又試下自己整~

材料:

三文魚骨  3大塊

蒜鹽  適量 (搽勻就得)
黑胡椒碎  適量 (搽勻就得)

橄欖油  適量 (搽勻就得)
PARSLEY  適量 (飾面)

做法:

1.  三文魚骨解凍洗淨、抹乾剪細件，用蒜鹽、黑椒、橄欖油略醃 

2.  放入焗爐先用180度焗20分鐘，再調高至230度焗5分鐘至乾身

3.  灑上PARSLEY飾面~

LA ROSE 玫瑰鍋之料理: 韓國小魚乾

好鍾意食韓國野

尤其係d前菜毫不吝嗇咁擺晒成枱

十分之有氣勢

然而

根據20/80 rule

最受歡迎&最快清碟必定係小魚乾&芝麻菠菜

喺仲有8成前菜嘅情況下

你係會唔好意思叫佢refill。。

好彩

偉大嘅fb俾我見到呢個食譜

自己整色整水又整左呢個小魚乾 :)

材料:

丁香魚乾  4兩

油  2tsp

麻油  2tsp

薑  4片

紹興酒  2/3蓋

老抽  1tsp

魚露  1/2tsp

蜜糖  2tbsp

白芝麻  1tbsp

指天椒  大半隻

做法:

1.  小魚乾略沖洗，然後浸清水5mins，撈起瀝乾，再用廚紙印乾

2.  白鑊細火烘乾小魚乾至乾身，盛起備用

3.  繼續細火，落油&麻爆香薑片，放入小魚乾炒至乾身，加入紹興酒續炒

4.  加入老抽上色、少少魚露

5.  夾起薑片，放入蜜糖炒至全部沾上

6.  加入白芝麻&指天椒(切粒)炒勻即可

Le Creuset之料理: Seafood Cataplana

對不起
我決定呢篇只分享成品張相
因為自覺未做到最好 
(雖然老公不斷話好食。。佢安慰我咋wa...?)

為左"收視"而share一D唔太準確嘅食譜
我真係做唔出

講返呢個cataplana
下次用chopped tomatoes應該就OK ga laa :)

(原食譜: http://www.lecreuset.com.hk/recipe/castiron/casserole/fish_stew)

(remarks: 老實講，今次個味道其實OK，只係我用左茄膏所以比較heavy)

Le Creuset之料理: 龍蝦汁黑松露意大利飯

自從買左個18 MARMITE之後
就挑起我煮意大利飯條筋

整碟(煲)靚靚上枱嘅感覺好滿足 :)

今次睇到呢個食譜
好似都幾容易
又試下啦~

(原食譜: http://bonnie.chiba78.com/articles-20518.html)

材料：

蝦  6隻

洋蔥  半個

乾蔥  2粒

蒜頭  5瓣(切片)

意大利米/台灣短米  1.5米杯

牛油  ~20g

白酒  100ml

龍蝦湯 400ml  (NOTE 1)

Parmesan cheese  1.5 tbsp

Parsley  少許

黑松露醬  2 tsp

(醃料) 海鹽、黑胡椒碎、料理酒 少許

做法:

準備功夫:

1.  蝦解凍，洗淨瀝乾切細件，用1tsp料理酒、1/2tsp海鹽&1/2tsp黑胡椒碎醃30mins。

2.  洋蔥、乾蔥切粒，蒜頭切片。

3.  米粒略沖，瀝乾備用。

開始煮:

4.  導熱板上放LC。小火落一半牛油煮溶。

5.  加入蝦肉略炒，落少少鹽，煎至7成熟(開始變色)夾起備用。

6.  原鑊加多少少油，放入洋蔥粒、乾蔥粒&蒜片爆香。

7.  落米炒勻至輕微金黃色。(NOTE 2)

8.  加入100ml白酒，炒至收乾。

9.  逐少逐少加入龍蝦湯去煮意大利飯，直至18mins完。

10.  加入剩低嘅龍蝦湯(加50ml鷄湯if needed)。滾起加蓋轉最細火焗煮10mins。(NOTE 3)

11.  開蓋加入蝦肉炒至9成熟，然後加入芝士碎&另外一半牛油攪勻 (加蒜鹽if needed -- 因為有D龍蝦湯本身好濃味、好鹹)

12.  先加1tsp黑松露醬於飯中拌勻，飯面再加1tsp黑松露醬、灑少少Parsley做裝飾即成!

NOTES:

1.  原食譜自己煮龍蝦湯，但我又懶，用現成罐頭龍蝦湯(超市買)。

2.  落米後開始TIME 18mins。
3.  唔夠稔可加蓋焗煮3-5mins。但我用台灣米焗煮完10mins已經夠稔~

後記:

今次全程將火調低2度就無痴底~

呀，白酒唔洗用D好靚嘅，我用一田 $20支嘅白酒JA~ 取其香之麻 :)

Le Creuset之料理: 西班牙海鮮飯

放假特別想煮D花時間嘅野
加上想煮個勁野嚟開個新煲 (註: Le Creuset Mimosa 18cm Marmite (似唔似外星文?))
所以就決定煮呢個<西班牙海鮮飯>

(原食譜: http://oniyomeryori.blogspot.hk/2012/04/blog-post_16.html)

材料:

Chorizo  ~60g 
Risotto rice  150g (NOTE 1)

蝦  6隻 (NOTE 2)

星斑魚塊  100g (NOTE 2)
小八爪魚鬚  8隻 (NOTE 2)

洋蔥  半個

黃椒  1隻

蕃茄  2個

蒜蓉  1tbsp
蕃紅花  少許 

甜椒粉  1tsp 
紅意粉醬  3tsp

雞湯  250ml (150ml + 100ml) (NOTE 3)

蒜鹽、黑胡椒碎、味醂、料理酒  少量

檸檬  半隻 (裝飾用)

  

做法:

準備功夫:
1.  急凍海鮮解凍，洗淨瀝乾切細件，用1tbsp料理酒、1tsp海鹽&1tsp黑胡椒碎醃30mins。然後用清水沖洗，瀝乾備用
2.  洋蔥、黃椒 、蕃茄洗淨切粒備用
3.  Chorizo切粒備用
4.  米粒略沖，瀝乾備用
5.  檸檬切細件

6.  蕃紅花用少少凍滾水(10ml)浸開 (一浸就見到好鮮艷嘅黃色~)

開始煮:

7.  落油預熱LC(NOTE 4)，小火炒香臘腸

8.  落洋蔥、蒜蓉、甜椒粉&蕃紅花(連水)，用小火炒香

9.  落米炒至每粒上色(Chorizo & 蕃紅花嘅色)，加入黃椒、蕃茄粒&紅意粉醬，然後加大約150ml雞湯至蓋過全部材料，拌勻滾起後，加蓋煮10mins*

10.  海鮮加少量蒜鹽、黑胡椒碎、料理酒&味醂(~1tsp@)拌勻。開蓋落剩低嘅100ml雞湯&1/3海鮮拌勻，其餘2/3海鮮就鋪喺飯面(但唔好攪)， 滾起後轉最細火焗12mins，熄火焗7mins至海鮮熟透 (NOTE 5)

11.  放上檸檬件，灑少少Parsley做裝飾。食嘅時候加少少檸檬汁吊味 (擠壓檸檬件即可)

  

NOTES:

1.  我用台灣珍珠米。

2.  海鮮好隨意，落自己鍾意嘅料就可以。通常會落青口，但今次無買。
3.  唔一定足250ml，總之蓋過全部材料即可。我今次用左一盒細嘅史雲生清雞湯。

4.  我有用導熱板。同平時一樣落油，開始熱就可以落料。
5.  如果發現米粒唔夠熟，可加蓋用最細火煮多5mins。至於海鮮如果比較大件就可以焗多一陣(~2-5mins)先開蓋。(per原食譜。但我今次OK)

後記:

起初跟原食譜嘅火喉。。。唔知係咪因為用左導熱板，痴底痴到傻，即刻將火調低2度。well，每家個爐頭唔同GE。。=.='

好彩，個煲底用布大力少少就捽得甩~

仲有，呢個餸聞說出面食要~$300。。。我估都真係要，因為屋企整都唔平，淨係Chorizo+蕃紅花都喺返度。。。

另外，我喺以下地方買食材 (註: 我無收佣):

• Chorizo(凍肉柜，有D已經切好一片片入真空袋)、蕃紅花、甜椒粉@CitySuper。紅椒粉有分辣同唔辣，而西班牙海鮮飯通常用唔辣嘅甜椒粉，即"Paprika noble sweet"
• 蝦、星斑魚塊@Market Place
• 洋蔥、有機黃椒、蕃茄、小八爪魚鬚(賣新鮮生蠔個櫃)@一田 

*下次下次下次下次*
1.  第一個10mins(STEP 9)可以轉用最細火，開蓋轉返小火落海鮮，然後先再轉最細火焗第二個12mins。
2.  老公話下次可以放少D湯。
3.  我懷疑第一次醃完嘅海鮮(STEP 1)唔洗沖水，因為之後(STEP 10)又要落返一樣嘅調味料~ 下次又試下先

我的新寵: