LA ROSE 玫瑰鍋之料理: 馬蹄糕

話說我開始煮野時遇過一大打擊
就係整馬蹄糕!
整左兩次都唔得
仲要成底硬哽 =.=

但最近見到一個二人份食譜
衰左都唔會太嘥
加上新年總係想應下節
又試下啦! OK WOR~

(原食譜: https://www.facebook.com/papaya.kitchen/posts/562954067203659)

材料: 
熟水  500ml
馬蹄粉  100g 
粟粉  10g
片糖 (蔗糖)  100g
新鮮馬蹄  6粒  

做法:
1. 馬蹄去皮，用拍蒜頭嘅手法拍散切粒 
2. 用250ml水將馬蹄粉和粟粉拌勻至冇粉粒，再過3-4次篩 (用蛋糕刮幫手壓下，如果太大粒唔溶就唔好要)
3. 糕盤掃上少少菜油備用
4. 用剩餘250ml嘅水，中小火將片糖煮溶後，加入馬蹄粒煮至再滾起
5. 轉最小火，先加入一半粉漿快手拌勻(要不停攪拌防止凝固)，再加入剩餘一半粉漿繼續攪拌，直至變得杰身成漿而且開始難攪拌即刻熄火&離火(約2-3分鐘)
6. 馬蹄漿倒入糕盤，將表面掃平和壓出中間的空氣(靜置1-2分鐘)，用微波爐保鮮紙封好  
7. 大火隔水蒸約45分鐘(要視乎糕盤厚度而定)，見到糕色變成透明狀時可以用牙簽試插入中間，如冇粉漿痴住即成

夏日之料理: 芒果糯米糍

好耐之前試過整芒果糯米糍
啱啱做起好好食
但一雪完就好硬
自此無再整過
因為夏天唔放雪柜好容易變壞。。

早排見到到呢個食譜
話可以放雪柜
even兩三日都得
仲見到有人跟住做而成功左
心思思自己都想試

由於得自己一個
唔敢整太多
將份量減半試下先
真係得wor!!

原食譜: http://cook1cook.com/recipe/14925

材料:
糯米粉  165g
陽光芒果汁  250ml (即一包)
砂糖  40g
呂宋芒  1個
椰絲  適量

做法:
1.  糯米粉+芒果汁+砂糖拌勻至無粉粒
2.  蒸碟搽少少油，然後倒入(1)，水滾放入隔水用中大火蒸30分鐘
3.  蒸好趁熱用筷子順時針攪拌至有粘性、筷子難以攪拌。重覆此動作約5分鐘 (per原作者，"此步驟可讓糯米糍的皮軟身易包出來的成品會煙煙unun")，然後放一邊自然待涼 (我等左約1小時。可用手指感受粉團係咪已經完全冷卻)
4.  將芒果起肉切細粒。另外將椰絲倒入一高身膠兜(方便"碌"糯米糍而唔痴手)
5.  戴手套，沾少少油於手套上，拎適量粉團搓揉攤開放入芒果粒然後收口，放入膠兜內碌上椰絲再放於牛油紙托
6.  可存放於食物盒內，但一定要鋪一張廚房紙喺面吸走水氣

夏日之料理: 麥提莎芝士凍餅

上網見到呢個食譜心思思想試

但買唔到細d嘅模

只有一個15cm直徑嘅(6寸)

唯有自己倍大份量試整

材料:

淡忌廉  200ml

忌廉芝士  250g

幼黃糖  60g

蛋黃  2個

檸檬汁  1.5小匙

麥提莎  20粒

魚膠片  8g

無鹽牛油  30g

消化餅  60g (約4塊)

做法:

1. 忌廉芝士放室溫至軟身(可輕易切開即可)

2. 淡忌廉打至企身(好似沖涼d厚泡泡)，放雪櫃備用

3. 消化餅放入食物袋，用麵棍碌碎，置於模內。牛油煮溶，混合餅碎再壓平，放入雪櫃備用

4. 忌廉芝士加糖(分幾次)打至軟身，依次加入蛋黃、檸檬汁拌勻

5. 麥提莎放入食物袋，用硬物拍碎，加入芝士漿內拌勻

6. 加入已打起忌廉拌勻

7. 魚膠片浸凍水至軟，撈起，再用熱水座溶，然後倒入芝士漿內拌勻，再倒入已墊好保鮮紙嘅蛋糕模內

8. 用完整麥提莎飾面，然後先放冰格雪20分鐘，再放普通格雪3個鐘

9. 用熱毛巾敷蛋糕模，慢慢"tun"出即成

LA ROSE 玫瑰鍋之料理: 香棗薑汁糕

我好鍾意食紅棗糕

又食過酒樓好好味嘅薑汁糕

所以一直想自己試下整 :)

做法: 

A: 薑汁85g+凍滾水135g+香棗片糖90g 

B: 粘米粉10g+糯米粉7g+木薯粉70g  

1. A開鍋煮溶 

2. 將A倒入B，拌勻隔篩 

3. 蒸盤掃一層薄油。粉漿每層蒸4分鐘，最近嗰層蒸20分鐘，竹簽插入冇黏即可 

4. 放涼後刀沾凍滾水切件上碟

*室溫可存放2-3日，但一入雪柜會變硬!

夏日之料理: 芒果糯米飯

去泰國食芒果糯米飯硬係覺得好食d

竅門原來係鹽!!

椰漿內加少少鹽就會即刻變調!

材料:

芒果  4隻 (呂宋芒甜d)

椰漿  1罐 (快達牌細罐)

糯米  1米杯

鹽  小半小匙 

糖  2大匙

生粉  半小匙

做法: 

1.  糯米洗淨浸水起碼1小時(我會放入雪櫃)。1小時取出倒走米水，置於蒸碟上，水滾用中大火隔水蒸20分鐘

2.  椰漿用小火煮熱，鹽+糖+生粉用3tbsp水先融合，再倒入椰漿內拌勻，試味，按個人口味再加鹽/糖--唔好滾，出煙、溶晒鹽糖即可

3.  將約一半(2)倒入蒸好嘅(1)，拌勻，閂蓋繼續焗等糯米吸收

4.  芒果切件，食時按個人口味淋上剩下椰漿~

LA ROSE 玫瑰鍋之料理: 紫薯椰汁糕(布甸)

老實講

我覺得有少少伏左

但又唔怪得哂人

邊個叫你信6g魚膠粉/片可以凝固到750ml液體je。。。

(雖然我即刻加碼魚膠粉，叫勉強成到型)

點都好

都應該記低今次有咩地方可以再改進

材料:

紫薯  230g (兩個約手心高嘅)

鮮奶  500ml

椰漿  250ml

糖  70g

馬蹄粉  60g

魚膠片6g + 魚膠粉  2小匙 (下次可以加多1-1.5小匙)

做法:

1.  紫薯隔水蒸30分鐘，去皮用叉壓成蓉 (如想有咬口可以唔洗全部壓成蓉)

2.  鮮奶+椰漿+糖+馬蹄粉(最後落)用小火慢慢煮熱 (唔洗滾)

3.  等(2)開始冒煙，預備魚膠片(先用凍水浸軟再用熱水座溶) / 魚膠粉 (用1大匙滾水開成漿) -- 注意時間，唔好俾佢凍左。

4.  當(2)開始變少少杰身，離火，加入魚膠漿拌勻，再加入紫薯薯蓉

5.  倒入器皿 (我一個正方+長方glasslock)雪起碼3小時

NOTE TO SELF:

呢個份量嘅魚膠粉可以做"布甸"，想再企身少少就加多D魚膠粉

LA ROSE 玫瑰鍋之料理: 蓮子百合雪耳甜湯

早排見到一D清潤糖水已經好想煲
老公今朝一早出左去做野
就趁得閒煲定D糖水等佢今晚返嚟食 :)

材料:
蓮子  ~30粒
百合  ~10片
圓肉  ~15粒
南北杏  適量
雪耳  1個
冰糖  適量(個人口味，約1粒乒乓波大)
凍滾水  1.5L (唔夠中間可加熱水)

做法:
1.  清水略洗蓮子百合圓肉南北杏，瀝乾備用
2.  用暖水浸發雪耳，剪走黃色硬蒂，撕成小塊備用
3.  煲內倒入凍滾水 + (1)之材料，中大火煲至水滾，閂蓋轉細火煲45分鐘。開蓋，放入雪耳轉中細火煲30分鐘 (我鍾意D雪耳爽口，所以可按個人喜好煲耐D至稔~)
4.  冰糖略沖洗放入煲內，全溶後即成~

秋之料理: 芝麻糕

我好鐘意食芝麻糕
亦試過自己整
但由磨芝麻開始好似要花好多時間

上星期忽發奇想
不如用即食芝麻糊試下!

(原食譜: 何師奶 ~《全職"煮"婦生活逸事 烹飪分享》)

材料:
多多牌芝麻糊  3包
糖  2大匙 (可略)
滾水  550ml
馬蹄粉  65g
粘米粉  15g
凍滾水  120ml
油  1/2大匙

做法:
1.  先用滾水開芝麻糊，加糖拌勻，放涼備用
2.  馬蹄粉+粘米粉略拌勻，加入凍滾水拌勻至無粉粒，過篩，加入油拌勻
3.  芝麻糊+馬蹄粉漿拌勻，倒入已掃油嘅蒸盤，蒸45分鐘
4.  待稍涼，放入雪柜雪兩小時+，成型後切件即成~ 

**

話說

一蒸出嚟係未成型

蒸左成40分鐘都仲有少少黏

即係本身唔夠馬蹄粉and/or粘米粉

但要我倒左去我真係唔捨得

太浪費

把心一橫放入雪櫃搏一舖

等左兩個鐘直到個芯都凍定左試下切

結果竟然又彈牙又好食!

放棄從來都比較易

但唔放棄可能有意外驚喜 :)

LA ROSE 玫瑰鍋之料理: 棗皇糕

我真係好鍾意食紅棗糕

飲茶見到一定嗌!

早兩日喺潮樓飲茶叫左一客

點知水準大降

嬲嬲地不如自己整!!

之前跟鬼嫁個食譜整過兩次

自家爐火加上屋企冇馬蹄粉

今次自己預份量~

材料:

去核紅棗  250g

滾水  1L

紅糖  130g

木薯粉  180g

糯米粉  40g

做法:

1.  紅棗用清水略沖洗，放入滾水中，待水再滾起，閂蓋轉最細火㷛半個鐘，之後熄火繼續焗1個鐘

2.  隔出450ml紅棗水(唔夠可嘗試壓紅棗)，倒入另一煲內加入紅糖煮至全溶

3.  一大碗內將糯米粉&木薯粉稍為混和，然後逐少加入紅棗糖水，拌勻至冇粉粒

4.  蒸盤掃油(方便之後起模)，以~120ml為一層(或按蒸盤大小)，用中大火每層蒸4分鐘。我蒸前會先將粉漿過篩，再搞勻才倒入蒸盤

5.  倒入最後一層粉漿後再蒸30分鐘至糕全熟

6.  普通格雪凍後，刀沾凍滾水切件，蒸熱食用，亦可即日凍食(賣點)!! 雪多過一日最好蒸熱先食，因為始終有糯米粉，會變硬身。

LA ROSE 玫瑰鍋之料理: 豆沙煎軟餅

我好鍾意食豆沙食品

好似豆沙鍋餅、草餅之類~

上次經過旺角奇趣

買左個豆沙燒餅食

老實講

豆沙偏少 

食得唔盡興

一直想自己整

網上見過兩個方法

(1)  滾水淥熟糯米粉後先包豆沙再煎香。好處: 煎出嚟乾身; 壞處: 搓粉團時好辣手!!! (真係幾辣手!)

(2)  室温水混和糯米粉包豆沙，煎嗰時先落少少熱水煎熟。好處: 快; 壞處: 煎出嚟可能冇咁乾身 (我估)

由於我鍾意乾身d，所以硬住頭皮熱就熱啦! (方法 1)

材料:

糯米粉  200g

糖  40g

水  180ml

油  2tbsp

豆沙(紅豆蓉)  150g

做法:

1.  豆沙分好10份搓圓

2.  水滾溶糖，落油，待***再滾起***即倒入糯米粉，用匙羹攪勻

3.  剛開始會一粒粒，待稍涼可用手搓成粉團至面光滑

4.  粉團分10份搓圓，壓平，放豆沙，收口，再輕力壓平成圓塊狀

5.  中細火每面煎4分鐘至金黄色(注意火喉)

多士焗爐煮大餐: 柚子蜜檸檬蛋糕

過去一個星期彷如千年

好似坐過山車咁

最深刻嘅感受

係你會真切地感受到身邊人嘅情感

二人成為一體

呢個講法真係無錯

星期六早上起嚟又係係新嘅一天

揀左個易做嘅蛋糕build up返 XDD

出嚟效果好好味

有d似嘉頓個雪芳蛋糕

但濕潤d、冇咁乾同食"空氣"feel

柚子蜜同檸檬夾埋好清新~

我個人好鍾意❤

另一個賣點

係我用菜油代替左牛油

*好似*冇咁肥

材料:

蛋黃  3隻

糖  25g

菜油  40ml

柚子蜜  1.5tbsp

檸檬汁  2tbsp

水  1tbsp

低粉70g

蛋白  3隻

糖  25g

做法:

1.  室溫蛋分開蛋白、蛋黃

2.  蛋黃加糖&油高速打至稍杰嘅lotion狀(~3mins)，再加入柚子蜜、檸檬汁&水(可預先混合並試味)拌勻，然後篩入低粉輕手拌勻至無粉粒

3.  蛋白加糖(分3次)高速打至企身(>2 mins)

4.  蛋白霜分3次加入蛋黃漿內拌勻，然後倒入已掃油焗盤內

5.  放入已預熱焗爐用160度焗20mins(有需要(竹簽插入而有沾黏)可加至180度焗多5mins)

**我用多士焗爐，所以上述溫度&時間已經調低左

多士焗爐煮大餐: 簡易布朗尼 (Brownies)

我好鍾意食BROWNIES
但亦知道佢好肥
所以唔敢成日整

上一次跟台灣CAROL嘅RECIPE整過一次
(http://caroleasylife.blogspot.com/2011/04/blog-post_29.html)
好好味
但工序頗多 (咁好味程序係應該同你付出嘅時間成正比嘅~)
一直放低左

今晚心癢癢想整甜品
就搵個簡易版(唔洗等牛油回復室溫、又唔洗用分蛋法)試下啦~

材料:
黑朱古力  140g (個人口味--我今次用左100g Lindt 70% + 40g喺759買嘅lotte dark chocolate)
牛油  125g
室溫蛋  3隻
糖  80g
低粉  60g
無糖可可粉  25g
咖啡粉  5g
堅果(合桃/腰果)  ~10粒(個人口味)

做法;
1.  朱古力+牛油切碎、座滾水熱溶備用
2.  高速打發[鷄蛋+糖]約2.5mins，再加入 (1) 嘅朱古力漿拌勻
3.  所有粉類混合，然後分兩次篩入去 (2) ，輕手拌勻至無粉粒
4.  將 (3) 倒入已鋪牛油紙嘅焗盤，面鋪上堅果碎，然後放入已預熱焗爐用150度焗20mins。竹籤插入中間，無黏附物即成。(多士焗爐太近發熱線，所以我調低左10度&快左10mins出爐~要睇火呀!!)



後記
雪普通格、凍左之後好似星星克個朱古力蛋糕!!

夏日之料理: 冰荔枝

呢篇其實談唔上係咩食譜
極其量係分享一種自己好鍾意嘅生果食法--冰荔枝!

好耐之前奶奶俾過我食之後就愛上左

亦覺得呢個民間智慧好有意思
一嚟可延長荔枝嘅保鮮期
二嚟大熱天返到屋企食一粒即刻透心涼~

噚晚奶奶俾左一袋荔枝我
返到屋企剝皮、去核、用凍滾水沖洗乾淨放入冰格即可~

大愛呀!!!

夏日之料理: 芒果河粉 (蒟蒻粉版)

夏天特別鍾意做芒果甜品 :)

其實一早想試呢個食譜

但中途見到其他更想整嘅甜品

所以一直擺埋一邊。。

噚日受左少少刺激

返到屋企就決定整樣簡單嘅野wind down

材料:

芒果  2個(切粒)

蒟蒻粉  3tbsp

糖  4tbsp

椰漿  200ml

凍滾水  200ml

做法:

1.  喺淺方盤中墊好保鮮紙 (以上份量大概做到2.5盤)

2.  用一隻碗裝好凍滾水，然後逐少加入蒟蒻粉、快手拌勻成蒟蒻液備用

3.  將椰漿加熱(中小火)煮溶糖，再加入蒟蒻液拌勻。粉漿再冒煙即可

4.  將粉漿薄薄倒一層喺淺方盤中，入普通格雪15mins至凝固 (其實佢好似大菜，室溫下已經開始凝固)
5.  將凝固左嘅蒟蒻粉切成條狀

6.  食時將芒果肉切粒放面 (另外可以用少少芒果肉壓成蓉做芒果漿) 

後記

老老實實

我覺得佢似烏冬多d  XDDD

夏日之料理: 綠茶豆腐芝士凍餅

對豆腐芝士凍餅有莫名嘅好感
可能係我一廂情愿地認為豆腐可以中和cream cheese嘅肥膩感

但遲遲未動手
係因為一般凍餅都會用到生蛋(我對生蛋有莫名嘅抗拒。。)

早排見到呢個食譜好似幾易
噚晚在家攤抖
相公又開會在外
就趁機預習教會下(或下下)次愛筵可準備嘅食物

材料:

忌廉芝士  100g

幼砂糖  5tbsp

百福蒸煮豆腐  1方磚 (掠乾水)

魚膠粉  1tbsp

綠茶粉  1tbsp

淡忌廉  125g

消化餅  100g

牛油  40g

做法:

預備功夫

1.  忌廉芝士於室溫下放至軟身 (~1hr)

2.  牛油隔熱水座溶備用

3.  消化餅放入食物袋用麵包棍碌碎，加入牛油溶液拌勻，倒入模壓平&壓實，放入冰格備用

開始做

4.  淡忌廉用電動打蛋器打至6成起紋 (似厚身lotion但又未完全企身)備用。期間要座冰水保冷
5.  **另一隻碗**內，忌廉芝士加幼砂糖用電動打蛋器打至幼滑

6.  加入豆腐拌勻至滑身
7.  綠茶粉過篩加入芝士漿內輕手混合

8.  淡忌廉加入芝士漿內輕手混合
9.  魚膠粉用1.5tbsp熱水溶至無粉粒，加入芝士漿內輕手混合，然後倒入模內 -- 呢個過程要快手，因為魚膠溶液容易"晾"

10.  先放入冰格雪20mins，再放入雪櫃普通格雪過夜

夏日之料理: 咖啡雪糕批

聞說
呢個係POKKA CAFE嘅皇牌甜品
兩件就盛惠$40
見到個食譜又想試下

MENU上佢叫咖啡凍餅
實際上係雪糕批 :)

材料:
純忌廉 Thickened Cream  200ml
煉奶  70ml

UCC114 咖啡粉  4tsp

云尼拿香精  1tsp

Oreo餅碎  1筒(137g)

牛油  40g

做法:
先做餅底

1.  牛油隔熱水座溶
2.  Oreo餅攆走中間d cream然後碌碎(分開兩份--for (1) 雪糕層 (30%) & (2) 餅底(70%))。加入牛油溶液拌勻，倒入模壓平&壓實，放入冰格備用

雪糕層
3.  用2tsp熱水(唔洗用滾水)溶咖啡粉，放入冰格備用
4.  忌廉加練奶拌勻，然後加入咖啡溶液、云尼拿香精、Oreo餅碎，拌勻再倒喺餅底上
5.  放入冰格雪過夜(~10hrs)

後記

煮野真係要執生

同埋要變通

今次喺原食譜有幾個改動

1.  去到超市冇晒用開嘅whipping cream，只有thickened cream，又心急想試整，所以照買。一倒出嚟，已經好似lotion咁(原食譜係whipping cream打至6成)，索性當已經打好，就咁加煉奶用電動打蛋器最細度數攪勻，再加其他材料拌勻就算。

另外原食譜係whipping cream同煉奶一開始就一齊打，但我思疑要分先後。anywayz，今次冇得試~

2.  我自己本身冇食開Oreo，所以唔知唔同packing有咩分別，求其買左最少份量嘅一筒裝算。d餅開出嚟好薄身，跟足原食譜嘅"塊數"用40g牛油就出大事 =.= 即刻返轉頭碌碎晒剩低嘅餅。。諗返先記起傳統包裝嗰d係厚身d。。好彩，用晒成筒嘅話都補救到。。

3.  原食譜用打起左嘅忌廉攞1tbsp加咖啡粉入微波爐叮一陣溶。但一嚟我冇微波爐，二嚟我覺得用打起左嘅忌廉要加熱溶咖啡粉好似做返轉頭咁，加上用忌廉做甜品嘅話成個過程最緊要凍。。。總之，我唔prefer用忌廉溶咖啡粉，而選擇用最少量嘅熱水，再放冰格備用。我本身主張所有材料嘅溫度唔好爭太遠。