LA ROSE 玫瑰鍋之料理: 超多蔥油豬扒

平時去越南舖食硬係覺得唔夠蔥。。。
今次自己整蔥油，食幾多都得!

(原食譜: 木瓜廚房 https://www.facebook.com/papaya.kitchen/) -- 好詳細!!!

材料：
新鮮梅頭豬扒  4塊 (可以厚少少)
蔥  1大扎
薑  幾片 

醃料：
黃薑粉  1/2小匙 (原食譜用香茅粉，但屋企無)
五香粉  1/2小匙
糖  3小匙
生粉  2小匙
魚露  3小匙
日本醬油  1小匙
胡椒粉  1/4小匙
麻油  1/2小匙 (原食譜無，我自己多手加)
(原食譜仲有蒜粉，但屋企無，又唔記得落蒜蓉 XDDD)

做法:
1. 蔥沖洗乾淨，用廚剪切粒備用 
2. 豬扒沖洗乾淨，抹乾水份，用刀背揼鬆(肉檔老闆好好人咁幫我拍鬆左)，再係側邊位置切一小刀(以防煎時豬扒會捲起)，然後用醃料醃起碼半個鐘 
3. 中小火落油將薑爆香，再落豬扒煎至兩邊金黃色，然後閂蓋轉最小火每邊焗煮5分鐘，焗煎期間會煎出水份
4. 開蓋用中小火煎至收乾水份及煎熟 (~5分鐘內)，上碟 
5. 原鑊加多少少油，待油滾(好快就滾!!!)，落蔥& 大半小匙鹽快手炒勻就熄火上碟
6. 將蔥油放喺豬扒上或分開上都得~

LA ROSE 玫瑰鍋之料理: 流心芝士豬肉餅

補寫返之前嘅食譜
中秋前一晚我地倆小口自己食
唔覺唔覺又煮多左野
忽然間想試下自己整流心芝士豬肉餅

無食譜就自由發揮
用之前"鹹魚煎肉餅"個食譜
但鹹魚馬蹄等就改為片裝車打芝士 (仲簡單!!!!)

材料:

豬絞肉  ~450g (12兩) (可做~16塊)

片裝車打芝士  1片

醃料:

生抽  2大匙

老抽  1大匙

豆粉  2小匙

糖  1小匙

胡椒粉  1小匙

麻油  繞1圏

做法:

1. 先用醃料醃豬肉 (30mins+)

2. 車打芝士撕成小片(半節手指大)

3. 將(1)撻至起膠

4. 雙手沾少少生粉，將肉團包入芝士片再搓成餅狀 (唔洗太厚，因為煎時會稍脹)

5. 先將肉餅雪30mins再煎 (煎時唔會散)

6. 先用細火煎熟，最後較中火上色

**可預先整定放冰格然後一星期內食完~ 

LA ROSE 玫瑰鍋之料理: 馬蹄鹹魚煎肉餅

遲來的食譜。。。

但呢個真係好好好好好味!!!!!!!!!!!

材料:

豬絞肉  ~450g (12兩) (可做~16塊)

馬蹄  3粒(去皮切粒)

鹹魚  1片

薑蓉  1小匙

陳皮  1瓣 (浸軟去囊剪碎)

醃料:

生抽  2大匙

老抽  1大匙

豆粉  2小匙

糖  1小匙

胡椒粉  1小匙

麻油  繞1圏

做法:

1. 先用醃料醃豬肉 (30mins+)

2. 鹹魚1片煎香拆肉

3. 預備薑蓉、陳皮碎及馬蹄粒

4. (1)+(2)+(3) 攪勻，再撻至起膠

5. 雙手沾少少生粉，將肉團搓成餅狀 (唔洗太厚，因為煎時會稍脹)

6. 先將肉餅雪30mins再煎 (煎時唔會散)

7. 先用細火煎熟，最後較中火上色

LA ROSE 玫瑰鍋之料理: 叉燒豆角炒飯

我雖然少左寫食譜

但冇偷懶㗎

上星期六先叫朋友上嚟食飯

亦因此煮多左飯

成就今晚嘅炒飯!

材料:

冷飯  約3碗

豆角  1小扎

叉燒  $15

洋蔥  1小個

蒜頭  2瓣

蛋  2隻

做法:

1. 豆角汆水，撈起切粒備用

2. 叉燒、洋蔥、蒜頭切粒備用

3. 少少油起鍋，先爆香蒜粒，放入洋蔥炒至透明，加入豆角同炒

4. 加入冷飯炒鬆，再加入叉燒粒，最後加入已發蛋液，中大火炒至乾身即可 (可加少少麻油提香)

LA ROSE 玫瑰鍋之料理: 梅菜蒸肉餅

肉餅係weekday恩物!

材料:

豬絞肉  $15

梅菜  1/3棵

做法:

1.  梅菜用清水浸1小時，然後沖洗當中沙粒，瀝乾切粒 (假日可先做呢個步驟，放冰格作儲備)

2.  梅菜用半小匙糖、半小匙麻油略醃

3.  豬肉用豉油(1tsp)、豆粉(2/3tsp)、糖(可省)、胡椒粉(適量)、麻油(適量)略醃

4.  2+3然後以筷子順時針拌勻，水滾以中大火蒸12分鐘即可

LA ROSE 玫瑰鍋之料理: 茄汁煎豬排

上星期見奶奶煮茄汁豬排

噚日又買多左個蕃茄

今晚一於試下自己煮~!

材料:

Sadia豬排  1盒4塊

醃料:

豉油  2tbsp

豆粉  1tsp

糖  1/2tsp

麻油  1/2tbsp

胡椒粉  1/2tsp

紹興酒  1/2tbsp

調味:

茄汁  4tbsp

Tabasco  1.5tsp (個人嗜辣程度)

豉油  1/2tbsp

糖  1/2tsp

豆粉  1tsp

水  3tbsp

(可以拌勻然後先試味!!!)

做法:

1.  豬排解凍，用刀背拍鬆，切成塊，用醃料醃起碼半小時

2.  2tbsp油起鑊，煎豬排至兩面金黃，盛起備用

3.  原鑊放蕃茄略炒，加調味料炒勻，放入豬排續炒，閂蓋轉中細火焗煮5分鐘，開蓋大火收汁即成(筷子可輕易穿過豬排)

LA ROSE 玫瑰鍋之料理: 韮菜豬肉餃

上個月整過餃子

味道較淡

今日再接再厲!

材料:

$3 韮菜

$30 半肥瘦梅頭(攪碎)

1斤 餃子皮

(包左63隻)

調味:

豉油  3.5大匙

生粉  2小匙

糖  1小匙

胡椒粉  適量

麻油  1大匙

做法:

1.  韮菜加少少油出水，切碎備用

2.  大碗內加入豬肉＆韮菜＆調味拌勻

3.  包餃子。。。煮熟食得

LA ROSE 玫瑰鍋之料理: 瑞士骨

上星期煮<瑞士雞翼>
剩低少少瑞士汁
索性用埋佢~

用煮鎮江骨嘅做法
超簡單!



材料:

一字排  ~300g (4件)

蒜頭  3瓣 (略切碎)

瑞士汁  半碗 

水  適量 (see step 2)

做法:

1.  新鮮一字排洗淨、汆水，撈起瀝乾備用

2.  少少油中小火起鍋(玫瑰鍋)爆香蒜頭，落一字排煎香兩面，放入瑞士汁，最後加水至剛蓋過材料8成 。待滾起閂蓋轉最細火炆20分鐘

3.  開蓋試味，轉小火收汁(~10分鐘，視乎個人鍾意嘅濃杰度)

4.  待稍涼，撇去浮面嘅油份，食前翻熱~

多士焗爐煮大餐: 韓式燒豬肋骨

太懶喇

好耐冇食過食譜喇

連上次個韮菜餃都冇寫

今次呢個簡單d

快d寫!!!

材料:

急凍豬肋骨  1條 (aeon超市，約$25)

韓式燒肉醬  足夠搽勻再多dd，約1/4支

做法:

1.  豬肋骨解凍洗淨，用廚紙索乾，放入食物袋，倒入燒肉醬，食物袋打結，隔住袋搽勻。放入雪櫃醃 (我出街前醃，醃左一個下晝)

2.  豬肋骨放於已鋪錫紙焗盤上，倒一半醃醬，用210度火，先骨向上(U型)焗25分鐘，翻轉，倒埋另一半醃醬，再焗25分鐘，食得! 

註:

1.  醃起碼一個鐘

2.  焗嘅exact時間要目測，我個多士焗爐好猛火!

LA ROSE 玫瑰鍋之料理: 鹹魚蒸肉餅

雖然大家會話要避免金屬製品與玫瑰鍋碰撞

但我會放個不銹鋼蒸架用玫瑰鍋蒸餸

因為個㷛傳熱同保溫都做得好好

咁輕手放咪得lor~ 

材料:

豬絞肉  $15 (~200g?)

鹹魚  1小塊

做法:

1.  用豉油(1小匙)、豆粉(1小匙)、糖(半小匙)、白胡椒粉(適量)、紹興酒(1小匙)、日清麻油(半小匙)醃肉

2.  薑兩片切絲；鹹魚略沖洗用廚紙抹乾備用

3.  肉餅平鋪於蒸碟，放上薑絲，最後放鹹魚

4.  水滾用中大火蒸12分鐘即成~

Le Creuset之料理: 南乳炆排骨

星期二晚心血來潮
唔想蒸排骨咁單調
所以試下用南乳炆
出嚟效果好好~好好餸飯 :)

(原食譜: http://tonynkaren.blogspot.hk/2008/07/stir-fry-ribs-with-lotus-roots-in_17.html)

材料:
排骨  300g
蒜頭  4瓣(切碎)
水  適量

醬汁:
南乳  1磚
柱侯醬  1/2大匙
醬油  1/2大匙
紹興酒  1/2蓋
片糖  1/4片(後落)

做法:
1.  排骨洗淨瀝乾，用豉油豆粉糖胡椒粉麻油紹興酒醃(由於要返工，我通常早一晚醃定)
2.  預備醬汁，除片糖以外，將所有"醬汁"內材料撈勻
3.  用1大匙油起鍋，爆香蒜蓉(小心蒜頭易燶!)，然後落排骨炒至金黃色，落醬汁炒勻，加水至排骨一半高，待滾起落片糖，閂蓋較至最細火炆20分鐘
4.  開蓋試味(按需要可加水)，較中小火收汁至理想杰度即可
5.  蔥粒飾面上枱 :)


**一定要試味!! 因為人人口味唔同，我跟足原食譜覺得比較咸，所以自己調較過(上述醬汁已調較過，途中亦加過水)

LA ROSE 玫瑰鍋之料理: 沙葛炒豬肉

因為<陳家廚房 - 最愛香港菜>而認識沙葛
星期日買餸買埋~

原來一個沙葛份量好多
有我兩個拳頭合埋再多DD咁大
切到一半覺得全部攞去炒就太多
所以攞左其中一半做<鹽麴沙葛> (沙葛可以生食; 切條然後淋上鹽麴~)
其餘就煮呢個<沙葛炒豬肉> 

材料:
豬腩片  240g
沙葛  大半個

做法:
1.  豬腩片用3大匙韓式醃肉汁醃15分鐘
2.  沙葛切去頂部即可撕去外皮。切條備用。
3.  少少油起鍋，加入豬腩片炒熟
4.  加入沙葛條+1大匙韓式醃肉汁，兜勻即可上碟~

**沙葛可以生食，所以略炒即可，否則會變稔影響口感

LA ROSE 玫瑰鍋之料理: 鮮茄肉丸螺絲粉

我好鍾意食IKEA肉丸

但唔知點解呢排堂食d肉丸好乾身

索性買一包返嚟自己煮

$7x一大包

有排食

有朋友嚟食飯又可以加餸

(唔洗解凍㗎、直接入焗爐就得)

早幾晚冇乜煮意

放工返到忽發奇想

一於整個焗肉丸螺絲粉!

材料:

螺絲粉  1碗

紅意粉醬  5tbsp

蕃茄  1個

車打芝士  1片

肉丸  8粒

Parmesan芝士碎  適量

做法:

1.  滾水落螺絲粉加少少鹽、油烚8分鐘至軟身，撈起瀝乾，放入焗盤然後加入意粉醬拌勻

2.  蕃茄切件去籽，鋪喺螺絲粉上，再依次放上芝士片、肉丸&芝士碎

3.  焗爐180度焗20分鐘即成!

LA ROSE 玫瑰鍋之料理: 泰式金不換炒肉碎

早兩日同同事食飯見到有人嗌泰式肉碎飯

咁呢

我自己本身又好鍾意

咁啱屋企有豆角

就自己試下煮

老實講

同普通炒肉碎差唔多

係豆角、金不換&魚露令佢變成"泰"式

自知唔正宗

所以我叫佢<太太式金不換炒肉碎>

較啱自己口味

惹味好餸飯~!

材料:

肉碎  ~160g

豆角  4條(每條約長30cm)

蒜頭  2大瓣

乾蔥  1小個

指天椒 小半隻

金不換  2小棵(只要葉)

醃料:

生抽  1tsp

老抽  1/2tsp

魚露  1/2tsp

生粉  1/2tsp

糖  1/2tsp

胡椒  1/2tsp

麻油  1/2tsp

做法:

1.  肉碎用醃料醃15分鐘。豆角洗淨瀝乾備用

2.  蒜頭、乾蔥、指天椒切碎

3.  滾水烚熟豆角(~2分鐘)，撈起，稍浸凍水降溫然後切成粒備用

4.  少少油熱鍋，先爆香蒜頭、乾蔥、指天椒，然後落豆角粒炒勻，再落肉碎炒熟。試味，可加1tsp魚露

5.  加入金不換同炒至香味出，即成!

LA ROSE 玫瑰鍋之料理: 冬菇蒸肉餅

對於一般家庭主婦再容易不過嘅餸
我今晚先第一次整

我知道
呢個餸每個屋企都有唔同整法、配搭~

(原食譜: http://siciwonderwall.blogspot.hk/2013/11/blog-post_15.html)

材料:
免治豬肉  160g
冬菇  2粒 (本身中size，發左好大粒~)

做法:
1.  冬菇用水浸軟(我出門口前浸冬菇放雪柜)、瀝乾後去蹄切粒，加少少糖&油醃15mins備用。
2.  免治豬肉用豉油(1tsp)、豆粉(1/2tsp)、糖(1tsp)、麻油(1/2tsp)、胡椒(1/4tsp)、紹興酒(1tsp) & 油(1/2 tsp)撈勻醃15mins (OR 可以前一晚醃定~)
3.  (1) + (2) 撈勻放於蒸碟上壓平，中大火隔水蒸15mins

**我覺得下次可以加多1tsp老抽 (多少少色同鹹返DD，雖然老公話夠味。。)

Le Creuset之料理: 鎮江骨

其實呢

我真係唔知道鎮江骨、糖醋排骨、數字骨係咪同一樣野

亦知道每家製法不同~

以下係我家嘅"密碼" XDD

材料:

一字排  ~300g (五件)

蒜頭  3瓣 (略切碎)

調味:

黑片糖  1.5-2片 (視乎每片厚度)

日本醬油  2.5tbsp (可用生抽)

紹興酒  3tbsp

鎮江醋  4tbsp

水  適量 (see step 3)

做法:

1.  新鮮一字排洗淨、汆水，撈起瀝乾備用

2.  少少油中小火起鍋(玫瑰鍋)爆香蒜頭，落一字排煎香兩面，盛起備用

3.  導熱板上放LC，用少少油中小火預熱，放回已爆香蒜頭&一字排，再放入調味料，最後加水至剛蓋過材料8成 (下圖左)。待滾起閂蓋轉最細火炆20mins

4.  開蓋試味(加糖/醋/生抽if needed)，轉小火(鑄鐵鍋用嘅火較細)收汁(~15-20mins，視乎個人鍾意嘅濃杰度)

5.  待稍涼，撇去浮面嘅油份，食前翻熱~

注意!!!

一定要試味

因為我個人鍾意"呷醋"

所以落醋比較重手

如果唔sure份量

可用小碗先混合調味料試味(黑片糖可溶於水)

試啱先加入一字排

另外

個汁本身比較濃味

所以齋食個汁可能會覺得鹹

但d肉就會好入味

個人意見 / 口味。。。

媽媽之料理: 鹹蛋蒸豬肉

大家比較少見我分享我母親大人嘅食譜

因為

佢係唔俾我入廚房㗎

所以婚前唔識㷛水是真的。。

而呢個餸係絕無僅有、由家慈親授嘅其中一項

--因為中二家政科考試要煮一道自選嘅、老少咸宜嘅餸

所以我就揀左呢個自己最鍾意、(suppose)最容易handle嘅鹹蛋蒸豬肉

我依稀記得

考試嗰日

個餸最終未熟曬 (=.=')

但因為誠意搭夠而成功過關~

之後一直冇機會再試

就趁今日啦!!

蒸出嚟個味好似媽咪煮嗰碟

係個樣有待改進 XDDD

材料:

碎梅頭豬肉  ~120g

鹹蛋  1隻

鷄蛋  2隻

凍滾水  ~100ml (~半碗水)

做法:
1.  碎肉加豉油、豆粉(即生粉)、糖(各3/4tsp)&少少胡椒粉撈勻、醃30mins
2.  鹹蛋分開蛋白、蛋黃。鹹蛋蛋白+鷄蛋打發備用;  鹹蛋蛋黃切半: 一半放面作裝飾，另外一半再切碎加入蛋漿
3.  蛋漿+凍滾水+碎肉撈勻，最後放嗰一半鹹蛋黃喺面
4.  水滾中大火隔水蒸12mins 、熄火焗多3mins即成

後記
我上網睇過有無其他人整呢個餸
出乎意料
鹹蛋蒸肉餅(山)就有好多
鹹蛋蒸豬肉(加鷄蛋)就好少

莫非
呢個係名副其實嘅家鄉菜?!

WMF之料理: 燻蹄

唔知邊度嚟嘅勇氣

噚日試整燻蹄!

之前一直唔敢整

係因為唔識扎實隻豬手

但我諗

最多唔夠圓啫

佢雪凍之後本質仍然係燻蹄

咁咪試下lor~

材料:

急凍鹹豬手  1隻

黑胡椒粒  1tbsp

八角  3粒

月桂葉  3片

(其實我只係好隨意攞屋企有嘅中式香料~)

做法:

1.  豬手解凍洗淨抹亁，然後汆水

2.  另起一㷛滾水，落豬手用中大火先㷛15mins，然後閂蓋轉細火㷛 1hr

3.  用筷子插入最厚肉部份，可穿過即夠稔&熟透。撈起浸冰水至內外全冷

4.  將豬手起肉(儘量一刀切、再慢慢起肉以保持型態)

5.  保鮮紙上放已起肉豬手"滾圓"包實。我無話幾多層保鮮紙，總之一直滾圓。最後就加多一層包實作整固

6.  雪起碼3hrs，成型後切片上碟 (我今次雪過夜)

醮汁:

生蒜、白醋、指天椒 (to taste)、水

-＞今次用左8瓣蒜頭切碎、壽司醋1.5tbsp (屋企冇白醋；用壽司醋都有好處--唔洗另外落糖)、指天椒半隻切碎、凍滾水2tbsp

總之要試味!!!!

後記

我覺得

成個過程最難係起肉同扎實

起肉時要貼住嚿骨

我亦真係唔小心拮左自己一下。。

另外

當我見到嚿肉由圓椎型變成圓筒型

覺得好amazing 

Le Creuset之料理: 韓式燉五花肉

為左可以用多d個18 marmite

早幾日買左本台灣出版嘅<燉一鍋x幸福>

雖然LC喺兩地同樣受歡迎

但論到"專"嘅食譜

我prefer台灣出版嘅

起碼無咁重"鱔稿"嘅味道(你懂的)

***

是晚胃口不佳

喺食譜中揀左呢個韓式燉(即炆)五花肉

所需時間不多

但超好送飯!!

材料:

五花肉  250g(切件)

芋絲  一盒(用清水浸洗2-3次)

蔥  2條(切段，留蔥白部份切粒放面作裝飾)

薑  3片

蒜  6片

調味料:

759韓式辣椒醬(紅色盒)  1.5tbsp

醬油  1.5tbsp

料理酒  1tbsp

味醂  1tbsp

麻油  1tsp

鹽  3/4tsp

指天椒  1小隻(切粒)

熱水  大半碗(以蓋過食材為準)

做法:

1.  五花肉洗淨，用滾水略沖，晾乾備用

2.  用一隻碗將所有調味料(除左水)拌勻備用

3.  LC放導熱板上，落少少油用中小火預熱，落蒜片、薑&蔥段炒香

4.  加入五花肉煎香(~5mins)

5.  加入調味料炒勻，加入適量熱水(至剛剛蓋過五花肉)後轉中火，滾起加蓋，轉最細火炆30mins

6.  開蓋轉中小火加入芋絲，再滾起即成。

7.  灑上蔥粒作裝飾

後記

今晚煮呢個餸好有挑戰性

因為

正當我開始煮嘅時候

老公放工返到嚟第一句話就係

"老婆，樓下爆水渠，鹹淡水都冇，洗唔洗我攞個桶落去裝d食水返嚟?"

(註: 我預備食材時食水供應無問題)

於是乎

我喺落薑蔥&五花肉之間嘅空檔

攞晒屋企可以裝水嘅容器去裝水喉內僅有嘅食水

同時要兼顧個火唔好燒燶個煲

好彩

個餸都成功出世 :)

(註: 煮完&食完飯都仲有乾淨食水供應。。老公，其實你係咪整蠱我。。)