759雲石煎鍋之料理: 蠔油冬菇燘雞翼

好神奇
我竟然未煮過呢個餸
今次因為要招待老公嘅朋友一家
有兩個小朋友所以想煮d易入口嘅餸
咁啱上網見到呢個食譜 
(http://carrietoffy0613.mysinablog.com/index.php?op=ViewArticle&articleId=4332986)
見有冰糖應該幾可靠
試左又ok wor 

材料:
冬菇 10隻
雞翼 12隻 (sadia)
薑蓉 1tbsp (因為無薑片=.=)
蒜蓉 1tbsp

醃料:
生抽 1tbsp 
老抽 1tbsp 
麻油 1tbsp 
鹽 1/2tsp
糖 1tsp
粟粉1tsp

調味:
蠔油 2tbsp
冰糖 2小粒
花雕 1蓋

做法:
(預備)
1. 冬菇用暖水浸軟(~30mins)，去掟
2. 雞翼解凍至9成，浸凍水加少少鹽去雪味 (~15mins)，再用醃料醃最少30mins (我醃左1個鐘)
(開始煮)
3. 用少少油中大火起鑊，爆香薑蓉蒜蓉，放冬菇再爆炒，落花雕兜抣
4. 放雞翼煎略兩面至金黃色，加小半碗水煮至滾起再落冰糖，閂蓋用細火先炆煮5分鐘,再轉中大火炆多5分鐘收汁(小心會燶!!!!!!!!!!!!!!)
5. 開蓋落1tbsp熱水及蠔油 (可以加蔥段)，閂蓋轉中火炆多5mins即成!! 

LA ROSE 玫瑰鍋之料理: 香煎蝦醬川辣雞翼

好耐無煮新菜色喇~
星期日難得同老公一齊買餸
仲買左盒來佬雞翼
一於試下新煮法

材料: 
雞翼  12隻

醃料:
蝦醬  1.5大匙
川椒醬  1小匙
糖  2小匙
薑粒  2小匙
紹興酒  大半蓋
麻油  1小匙

做法:
1.  雞翼解凍，用凍水略沖、抹乾，於雞翼表面界一刀再用醃料醃20分鐘。
2.  少少油起鑊，落雞翼用中火煎香兩面至微金黃色。注意鍋要夠大令每隻雞翼平均受熱，亦唔好成日翻轉

3.  兩面都煎香表皮後，閂蓋，較細火焗煮雞翼至熟 (我每3分鐘check下&翻轉一次) 骨頭外露即代表熟--呢個step約10-12分鐘 (視乎火喉＆鷄翼大細)

LA ROSE 玫瑰鍋之料理: 沙薑蒸滑雞

自從老公帶飯 
買餸時又多一個考慮
包括買餸嘅份量同埋等到下一餐仲好唔好食等等
所以鮮雞依家係幾好嘅食材~
今次呢個好簡單
只要隻雞新鮮就好味!






















材料:
新雞半隻 (購自market place，已斬件)
沙薑鹽焗雞粉  約1.5大匙 (好味牌)^
紹興酒  約1大匙
薑  幾片

做法:
1. 雞件洗淨用廚紙印乾放入食物袋，加入沙薑鹽焗雞粉、紹興酒及薑捽勻，醃一晚
2. 中大火隔水蒸20分鐘，熄火唔好開蓋焗多5-10分鐘即成! (可按個人喜好蒸前加指天椒)


^其實我地食得比較淡，所以可按個人口味加鹽焗雞粉，或食時用鹽焗雞粉+麻油做沙薑汁~

LA ROSE 玫瑰鍋之料理: 瑤柱貴妃雞

我個人覺得除左老火湯
第二樣主婦一定要識嘅
就係handle一隻全雞
特別係因為老公鍾意食
但自己一直唔識整
(e.g.點樣清理內臟、點醃等等)
所以so far都只限於喺market place買D已經斬件嘅返嚟煮

今次奶奶介紹左喺誠哥度買嘅貴妃雞 (正價$49，特價$40)
雖然差唔多係熟左
返嚟只需加熱就食得
但都俾我可以試下自己切件
用骨剪幫手再砌返靚都呃到人架!

做法:
返嚟用滾水淥一淥去除表面油份，用骨剪剪成兩半(因為太大隻)，隔水大火蒸12分鐘，再用骨剪剪成小件即成!

註:
1. 我無用隨包附送嘅蔥油而自己用沙薑粉+麻油開左沙薑汁~
2. 其實佢係一隻完整嘅雞，係我自己太驚，所以一開包裝即刻切走個頭先。。。

LA ROSE 玫瑰鍋之料理: 沙薑雞腳

最近真係好忙

雖然都有煮新菜色

但無好好寫返食譜

係時候pick-up返!!

今次呢個沙薑雞腳

原食譜嚟自鬼嫁 (http://oniyomeryori.blogspot.hk/2012/03/blog-post_23.html)

自己再預份量

第一次整就成功 :)

材料:

新鮮雞腳  16隻(market place鮮肉雪櫃，2 pack)

汁料:

滾水  約2杯

薑  3片

紹興酒  1蓋

沙薑鹽焗雞粉  約3大匙 (好味牌)

五香粉  大半小匙(一定唔落得多! 會苦!!)

白胡椒粉  適量

糖  1小匙

海鹽  1小匙

沙薑汁:

沙薑鹽焗雞粉  1.5小匙

日清麻油  1.5小匙(或蓋過沙薑雞粉即可)

(按個人喜好濃稠度)

做法:

1.  洗淨雞腳剪去腳甲，汆水約3分鐘撈起，沖凍水至冷卻

2.  㷛內混合所有汁料，試味至略鹹，中小火煮至滾起，落雞腳，再滾起閂蓋較最細火煮20分鐘，開蓋以中小火繼煮5分鐘，撈起上碟，佐以沙薑汁即成

LA ROSE 玫瑰鍋之料理: 香煎椒鹽雞翼

我鍾意跟唔同食譜煮
其中一個我鍾意參考嘅就係Christine
咁啱佢又係christian
好似更加親切 :)

早兩日公假
有多少少時間預備老公嘅lunch box
就整個香煎椒鹽雞翼啦!

原食譜: http://www.christinesrecipes.com/2014/09/salt-pepper-chicken-wings.html

材料: 
雞翼  8隻
紹興酒  大半蓋

醃料:
鹽  1/2小匙
醬油  1小匙
糖  1/2小匙
五香粉 1/2小匙
鮮磨黑胡椒碎  1小匙
紹興酒  大半蓋

做法:
1.  雞翼解凍，放入滾水中(加紹興酒)略煮3分鐘去血水。撈起、用凍水略沖。用醃料醃30分鐘
2.  少少油起鑊，落雞翼用中火煎香兩面至微金黃色。注意鍋要夠大令每隻雞翼平均受熱，亦唔好成日翻轉

3.  兩面都煎香表皮後，加入醃料然後閂蓋，較細火焗煮雞翼至熟 (我每3分鐘check下&翻轉一次) 骨頭外露即代表熟--呢個step約10-12分鐘 (視乎火喉＆鷄翼大細)

LA ROSE 玫瑰鍋之料理: 泰式雞翼(凍食)

上次整完凍鮑魚覺得個汁好好味

所以又試下用個汁整其他野~

材料: 

雞翼  10隻

薑  3片

蔥段  適量

紹興酒  大半蓋

醬汁: (以下份量係約莫數，因為我一路試味一路調較)

蒜  6瓣(切碎)

芫茜  1扎(切碎)

青檸汁  2個

蠔油  4-5大匙

魚露(咸)  3-4小匙

糖  1小匙

指天椒  3隻(切碎)

凍滾水  約50ml

做法: 

1.  雞翼解凍洗淨，㷛滾水放入雞翼、薑、蔥、紹興酒，待再滾起閂蓋轉小火多煮3分鐘，熄火，焗40分鐘。由閂蓋一刻開始唔可以再開蓋!!

2.  較好醬汁，多少視乎雞翼份量而作加減，總之個汁個"胆"係《蠔油+魚露+青檸》，唔夠/太杰可加水，但亦要相應加添上述"三寶"，太辣則可加糖。總之一定要試啱自己口味先攞去醃雞翼

3.  雞翼煮好過"冰"河，全涼後抹乾放入盛器，再放入(2)嘅醬汁雪一晚即成!

夏日之料理: 糟鹵雞翼

之前整嘅醉雞翼比較實

今次改用浸熟方式(slow cook?!)

材料:

雞翼  20隻

醉雞汁:

紹興酒  150ml

糟鹵  150ml

玫瑰露  小半蓋 (可略)

麻油  半小匙

指天椒  1隻 (剪碎)

糖  半小匙

(先試味!)

做法:

1.  雞翼解凍洗淨，與薑蔥同放入滾水中，待再滾起加蓋轉小火煮多5分鐘，熄火，焗25分鐘

2.  取出雞翼過冰河(即凍滾水加冰)

3.  雞翼置於器皿，倒入醉雞汁，雪起碼3小時即成~

原食譜敎煮1.5分鐘，但始終雞肉。。熟d好。。況且煮5分鐘都滑丫~

多士焗爐煮大餐: 焗藍象青咖哩雞排

呢個真係好好味!!!

材料:

Sadia 雞排  1盒兩大塊

醃料:

藍象青咖哩醬  2tbsp

泰式魚露  1.5tbsp

糖  2.5tsp(中和辣度，可按個人食辣程度加減)

麻油  1tsp

水  2tbsp

乾檸檬葉  3塊捏碎

(以上調味料較啱個人口味先攞去醃肉!)

做法: 

1.  雞排解凍洗淨抹乾放入食物袋，加醃料拌勻醃一晚

2.  先焗肉向上一面(210度20分鐘)，返轉皮向上一面再用230度焗15分鐘即成(目測皮略焦即可)

多士焗爐煮大餐: 冬蔭焗雞翼

又係試香料時間!

今次係藍象冬蔭功醬

材料:

Sadia雞翼  1盒12隻

藍象冬蔭功醬  2tbsp

泰式魚露(鹹)  1tbsp

糖  1/2tsp

麻油  1/2tsp

指天椒  大半隻剪碎

檸檬葉  小半片捏碎

做法:

1. 雞翼解凍略沖水，抹乾放入食物袋備用

2. 以上調味料用另一隻碗調好至個人口味即可倒入食物袋醃雞翼，醃起碼1小時

3. 焗爐220度焗25分鐘即可

Note:

下次可以再多d辣椒＆檸檬葉

WMF之料理: 咖哩薯仔燜雞翼 (利川)

咖哩好好送飯~

但以前有個不知名原因
硬係覺得整咖哩好大陣仗所以少煮

之後有田師傅咖哩醬

但唔係成日見得

上星期抽起條筋把心一橫買左利川嚟試

結果反而係最滿意!

材料:

蒜  1大瓣(切碎)

利川咖哩醬  3.5大匙(差唔多半樽)

雞翼  12隻

薯仔  2隻(切件)

熱水  約1碗

指天椒  1隻(精髓!)

做法: 

1.  薯仔批皮切件浸清水備用

2.  起鍋煎封雞翼(兩面變微金黃)盛起備用

3.  中小火爆香蒜粒＆咖哩醬，落薯仔＆雞翼炒至均勻上色，加熱水至蓋過食材7成，剪碎一隻指天椒，待再滾起閂蓋轉最細火燜20分鐘食得~ (期間要不時開蓋攪一攪)


btw, 我真係好鍾意個煲~~

WMF之料理: 咖哩薯仔燜雞翼(田師傅)

話說

新年嗰時喺奶奶度食飯

見到其中一個細細地嘅不鏽鋼㷛

用嚟燜冬菇

鐵匙羹同不鏽鋼豪氣嘅碰撞聲令我驚為天人

加上體積細細

啱晒2人家庭

(其實我一直想買個16cm LC，但顏色唔啱心水)

星期六行過一田
見到廚具展
WMF係其中一參展商
咁啱見到呢個細細地嘅煲做緊特價$388
心大心細左一晚終於決定返去買!

返到屋企用半個檸檬捽勻個煲
再用佢煲一煲滾水
咁就簡單完成開煲喇~

即晚煮個咖哩薯仔燜雞翼試一試個煲 :)

材料:
雞翼  10隻
新薯  2大個
田師傅咖哩調味包  1包

做法:
1.  新薯批皮切件，浸水1個鐘洗去多餘澱粉質
2.  起鑊略煎新薯備用; 煎雞翼至兩面金黃備用
3.  新薯+雞翼放入煲內，加入咖哩醬炒香，然後加滾水至蓋過食材8成，待再滾起加蓋轉最細火燜15分鐘。開蓋試下薯仔熟未(筷子輕易穿過)，未得就以5分鐘計繼續燜。
4.  試味，如覺得太辣可加糖(我會加2.5小匙糖)拌勻即成。亦可按個人口味加入椰漿或奶(我無)

LA ROSE 玫瑰鍋之料理: 瑞士雞翼

今晚有人嚟食飯

只不過未完全好返

煮唔到太多野

見有小朋友

煮瑞士雞翼就啱曬

但

其實我唔識煮

唯有搵李錦記幫手 XDD

材料:

雞翼  24隻 (sadia兩盒)

李錦記瑞士汁  1.5碗

滾水  1.5碗

薑  2片
蔥  1條切段

做法:
1.  雞翼解凍，用薑蔥出水(一變色即撈起)，沖凍水至雞翼全凍
2.  瑞士汁加滾水先試味 (我用1:1)，中大火滾起放雞翼，再滾起加蓋轉細火煮8分鐘，煮好唔好開蓋由人佢焗，食前re-heat



註:
唔整咁多
就(汁+水)蓋過雞翼即可

多士焗爐煮大餐: 韓式芝麻雞翼

話說
我盡量減少食雞翼
只會一個月一次"雞翼"大餐 (!!!)

但無可否認
雞翼係一種好好嘅食材
特別係無咩"煮"意時。。。

噚日諗住整個勁野
但放工後個人已經無咩戰鬥力
又唔想hea整
怕嘥左個食譜
所以又諗下有咩新野可以試
醒起雪柜有支韓式燒肉汁
min preparation + 穩陣調味
cant go (too) wrong laaaa

材料:

Sadia雞翼一盒12隻
韓式燒肉汁  5-6大匙 (足以醃勻所有雞翼為準)

白芝麻  適量

做法:
1.  雞翼解凍洗淨，放入食物袋，加醃料醃起碼1小時
2.  期間白芝麻放入小碗入焗爐用100度焗8分鐘備用 (焗好可繼續放於焗爐內)
3.  雞翼鋪喺錫紙上，灑上白芝麻用220度焗25分鐘即成 (我想燶少少，D皮會脆D~)

呢支燒肉汁我係喺韓國托返嚟

返到嚟先知market place有得買。。。

有少少辣，又有BBQ蜜糖嘅味道! 好好味 :)

多士焗爐煮大餐: 麥啤雞脾

我真係好掛住個廚房!!!!!!!!!!!!!!!!!!!!!!!!!!

上個月由月中開始
日日有事要喺街食
食到個人好滯好飽 =.=
(其實都好感恩有咁多好野食)

噚晚終於可以喺屋企煮飯
好好好好開心 :) :)

今次手多多整左個 <麥啤雞脾>
係喺FACEBOOK到學嘅 (忘記左個名。。sorry!! )
本住咩都試下嘅心態又整左~
出嚟效果唔錯
用嚟整雞翼應該更好味!!

初時以為用麥啤會怪
但諗諗下
醉雞咪一樣以酒入饌
結果好好味! 
小麥味道仲好出!!!

材料:

雞脾  2大隻

醃料 A: 

麥啤  1/2罐 (以醃過雞脾為準)
海鹽  大半小匙

醃料 B: (份量以搽勻雞脾為準)
甜椒粉  1小匙
蒜鹽  1.5小匙
黑胡椒碎  大半小匙

做法:

1.  早一晚雞脾解凍洗淨，放入食物袋，加醃料A醃起碼1小時 (我醃過夜~)

2.  用KITCHEN PAPER稍為印乾醃料A，之後用醃料 B搽勻雞脾

3.  雞脾放喺錫紙上，先皮向下用180度焗15分鐘，倒走多餘油份，反轉，皮向上用180度焗10分鐘，調高至210度焗多10分鐘 (我用多士焗爐，所以食物較接近發熱線而需要用低D溫度!! 一般焗爐就可以試下all along用200分鐘，最緊要耐唔耐望下)