LA ROSE 玫瑰鍋之料理: 馬蹄糕

話說我開始煮野時遇過一大打擊
就係整馬蹄糕!
整左兩次都唔得
仲要成底硬哽 =.=

但最近見到一個二人份食譜
衰左都唔會太嘥
加上新年總係想應下節
又試下啦! OK WOR~

(原食譜: https://www.facebook.com/papaya.kitchen/posts/562954067203659)

材料: 
熟水  500ml
馬蹄粉  100g 
粟粉  10g
片糖 (蔗糖)  100g
新鮮馬蹄  6粒  

做法:
1. 馬蹄去皮，用拍蒜頭嘅手法拍散切粒 
2. 用250ml水將馬蹄粉和粟粉拌勻至冇粉粒，再過3-4次篩 (用蛋糕刮幫手壓下，如果太大粒唔溶就唔好要)
3. 糕盤掃上少少菜油備用
4. 用剩餘250ml嘅水，中小火將片糖煮溶後，加入馬蹄粒煮至再滾起
5. 轉最小火，先加入一半粉漿快手拌勻(要不停攪拌防止凝固)，再加入剩餘一半粉漿繼續攪拌，直至變得杰身成漿而且開始難攪拌即刻熄火&離火(約2-3分鐘)
6. 馬蹄漿倒入糕盤，將表面掃平和壓出中間的空氣(靜置1-2分鐘)，用微波爐保鮮紙封好  
7. 大火隔水蒸約45分鐘(要視乎糕盤厚度而定)，見到糕色變成透明狀時可以用牙簽試插入中間，如冇粉漿痴住即成

夏日之料理: 麥提莎芝士凍餅

上網見到呢個食譜心思思想試

但買唔到細d嘅模

只有一個15cm直徑嘅(6寸)

唯有自己倍大份量試整

材料:

淡忌廉  200ml

忌廉芝士  250g

幼黃糖  60g

蛋黃  2個

檸檬汁  1.5小匙

麥提莎  20粒

魚膠片  8g

無鹽牛油  30g

消化餅  60g (約4塊)

做法:

1. 忌廉芝士放室溫至軟身(可輕易切開即可)

2. 淡忌廉打至企身(好似沖涼d厚泡泡)，放雪櫃備用

3. 消化餅放入食物袋，用麵棍碌碎，置於模內。牛油煮溶，混合餅碎再壓平，放入雪櫃備用

4. 忌廉芝士加糖(分幾次)打至軟身，依次加入蛋黃、檸檬汁拌勻

5. 麥提莎放入食物袋，用硬物拍碎，加入芝士漿內拌勻

6. 加入已打起忌廉拌勻

7. 魚膠片浸凍水至軟，撈起，再用熱水座溶，然後倒入芝士漿內拌勻，再倒入已墊好保鮮紙嘅蛋糕模內

8. 用完整麥提莎飾面，然後先放冰格雪20分鐘，再放普通格雪3個鐘

9. 用熱毛巾敷蛋糕模，慢慢"tun"出即成

LA ROSE 玫瑰鍋之料理: 棗皇糕

我真係好鍾意食紅棗糕

飲茶見到一定嗌!

早兩日喺潮樓飲茶叫左一客

點知水準大降

嬲嬲地不如自己整!!

之前跟鬼嫁個食譜整過兩次

自家爐火加上屋企冇馬蹄粉

今次自己預份量~

材料:

去核紅棗  250g

滾水  1L

紅糖  130g

木薯粉  180g

糯米粉  40g

做法:

1.  紅棗用清水略沖洗，放入滾水中，待水再滾起，閂蓋轉最細火㷛半個鐘，之後熄火繼續焗1個鐘

2.  隔出450ml紅棗水(唔夠可嘗試壓紅棗)，倒入另一煲內加入紅糖煮至全溶

3.  一大碗內將糯米粉&木薯粉稍為混和，然後逐少加入紅棗糖水，拌勻至冇粉粒

4.  蒸盤掃油(方便之後起模)，以~120ml為一層(或按蒸盤大小)，用中大火每層蒸4分鐘。我蒸前會先將粉漿過篩，再搞勻才倒入蒸盤

5.  倒入最後一層粉漿後再蒸30分鐘至糕全熟

6.  普通格雪凍後，刀沾凍滾水切件，蒸熱食用，亦可即日凍食(賣點)!! 雪多過一日最好蒸熱先食，因為始終有糯米粉，會變硬身。

多士焗爐煮大餐: 柚子蜜檸檬蛋糕

過去一個星期彷如千年

好似坐過山車咁

最深刻嘅感受

係你會真切地感受到身邊人嘅情感

二人成為一體

呢個講法真係無錯

星期六早上起嚟又係係新嘅一天

揀左個易做嘅蛋糕build up返 XDD

出嚟效果好好味

有d似嘉頓個雪芳蛋糕

但濕潤d、冇咁乾同食"空氣"feel

柚子蜜同檸檬夾埋好清新~

我個人好鍾意❤

另一個賣點

係我用菜油代替左牛油

*好似*冇咁肥

材料:

蛋黃  3隻

糖  25g

菜油  40ml

柚子蜜  1.5tbsp

檸檬汁  2tbsp

水  1tbsp

低粉70g

蛋白  3隻

糖  25g

做法:

1.  室溫蛋分開蛋白、蛋黃

2.  蛋黃加糖&油高速打至稍杰嘅lotion狀(~3mins)，再加入柚子蜜、檸檬汁&水(可預先混合並試味)拌勻，然後篩入低粉輕手拌勻至無粉粒

3.  蛋白加糖(分3次)高速打至企身(>2 mins)

4.  蛋白霜分3次加入蛋黃漿內拌勻，然後倒入已掃油焗盤內

5.  放入已預熱焗爐用160度焗20mins(有需要(竹簽插入而有沾黏)可加至180度焗多5mins)

**我用多士焗爐，所以上述溫度&時間已經調低左

多士焗爐煮大餐: 簡易布朗尼 (Brownies)

我好鍾意食BROWNIES
但亦知道佢好肥
所以唔敢成日整

上一次跟台灣CAROL嘅RECIPE整過一次
(http://caroleasylife.blogspot.com/2011/04/blog-post_29.html)
好好味
但工序頗多 (咁好味程序係應該同你付出嘅時間成正比嘅~)
一直放低左

今晚心癢癢想整甜品
就搵個簡易版(唔洗等牛油回復室溫、又唔洗用分蛋法)試下啦~

材料:
黑朱古力  140g (個人口味--我今次用左100g Lindt 70% + 40g喺759買嘅lotte dark chocolate)
牛油  125g
室溫蛋  3隻
糖  80g
低粉  60g
無糖可可粉  25g
咖啡粉  5g
堅果(合桃/腰果)  ~10粒(個人口味)

做法;
1.  朱古力+牛油切碎、座滾水熱溶備用
2.  高速打發[鷄蛋+糖]約2.5mins，再加入 (1) 嘅朱古力漿拌勻
3.  所有粉類混合，然後分兩次篩入去 (2) ，輕手拌勻至無粉粒
4.  將 (3) 倒入已鋪牛油紙嘅焗盤，面鋪上堅果碎，然後放入已預熱焗爐用150度焗20mins。竹籤插入中間，無黏附物即成。(多士焗爐太近發熱線，所以我調低左10度&快左10mins出爐~要睇火呀!!)



後記
雪普通格、凍左之後好似星星克個朱古力蛋糕!!

烏龍之料理: 合桃紅莓蛋糕

以為失敗左

點知今朝食又幾好食

個texture仲要係咁多次之中最好

哈

有時總要錯下先知有咩可以改進

又或者會錯有錯著

不過唔係個個人都see failure a positive thing

而自己錯同人地錯又有唔同睇法

極致就係

自己永遠唔會錯

一定係人地錯

(你懂的)

***

噚晚plan左焗個蛋糕

見食譜用50g粉

啱2人份量

又唔洗用分蛋法

所以好想試

焗出嚟好靚仔

唯獨個底有少少燶

亦因此冇細味個蛋糕

淨係記住個底燶左少少。。

同時懷疑自己係咪同個焗爐未friend

今朝起身唔忿氣

又唔想嘥野

於是片走左個底

再將個蛋糕切細件

食落好感動

因為好好味

要放棄真係好容易

尤其喺一個資源豐富嘅社會

但唔放棄、將人地眼中嘅失敗逆轉

先係最重要

容許我今篇講多左

(原食譜: https://www.facebook.com/photo.php?fbid=823628121001631&set=pcb.795172347179912&type=1&theater)

材料: 
室溫蛋  2隻
幼砂糖  50g
低粉  50g
牛油  20g

紅莓乾  適量

原味合桃  適量

做法:
1.  牛油隔熱水座溶備用
2.  蛋加幼砂糖用高速打到有清晰玟理 
3.  分兩次篩入低粉，用打蛋器(Whisk)拌勻至無粉粒
4.  加入牛油溶液拌勻，最後加入紅莓乾及已沖洗索乾嘅合桃碎 (錯誤1: 紅莓乾要先用RUM / 熱水浸軟身)
5.  放入已預熱焗爐用160度焗20-25mins(蛋糕面一上色(~8mins)就蓋錫紙)。竹籤插入中間，無黏附物即成。(錯誤2: 紅莓乾沉底所以容易燶; 下次 (1) 先浸軟紅莓乾 / (2) 最後5mins只用上火 / (3) 換個焗盤)



題外話
噚日fb發生侵權+冒認事件
即刻check下自己D食譜有無唔覺意侵權。。

正如先前提及
有D食譜(1)係喺街開fb cap左圖
未必可以記低出處
又或者(2)自己試過份量唔啱自己口味
為免冒犯左原創者
所以隱去出處

如果呢個BLOG有任何冒犯之處
請務必指正! 

電飯㷛之料理: 班蘭蛋糕(預拌粉)

上次個班蘭蛋糕經蒸籠搶救後順利出世~

但係對於電飯㷛未能完成整個過程有d耿耿於懷。。

好彩

呢個世界有fb!!

收集各方意見

今晚再戰電飯㷛!

汲取上次教訓

今次再將份量調低至1/4盒粉

註: 我係用2-4人傳統飯㷛

材料:

班蘭蛋糕預拌粉  100g

室溫蛋  2隻

椰漿  45ml

做法:

1.  高速度打發鷄蛋3分鐘

2.  加入預拌粉用高速拌勻6分鐘至企身

3.  加入椰漿拌勻(手攪就ok~)

4.  電飯㷛膽掃上一層油，倒入麵糊，放入電飯㷛

5.  啪掣、跳掣、等-＞重複以上步驟約3至4次、直至竹簽插入而comes out clean就ok (第3次跳掣後可開始試"竹簽test")

6.  用刀輕力圍邊刮起蛋糕(內膽之前已經掃左油，所以用刀貼住邊輕輕轉一圈就脫到模) 得左~


後記

常見問題

1.  蛋糕唔夠高
可能成因: (1) 個電飯㷛太大而太少粉 (2) 打發唔夠
解決方法: (1) 較返啱比例 e.g. 2-4人份嘅電飯㷛用100-200g粉，個飯㷛大D就用晒成盒 (2) 蛋打足3分鐘，麵糊打足6-8分鐘

打發足就會鬆軟D (如下圖)

2.  個面唔得完整
可能成因: (1) 個電飯㷛未 / 唔夠油 (2) 個蛋糕未熟
解決方法: (1) 搽一層油後至倒入麵糊 (2) 重複<啪掣、跳掣>多一次再插竹簽，未得就重複到熟為止~

3.  個飯㷛不斷跳掣
解決方法: (1) 堅持下去!!! 重複到熟為止  (2) 攞去蒸~ 

4.  邊度買班蘭蛋糕預拌粉
街市印尼鋪，大概$20-$22。要留意有無中英文指示，無都無所謂，反正上網好多resources。百佳都好似有，大概$3x

烏龍之料理: 蒸焗班蘭蛋糕

有睇早幾篇分享

都知道我真係好鍾意食班蘭蛋糕

上次冇左支班蘭香精整唔成

呢幾日見到fb有人成功用預拌粉+電飯㷛焗到班蘭蛋糕

心思思又想試下

然而
買左盒粉返嚟先發現無中英文說明。。(=.=')

好彩fb有人分享做法

預備好材料就開工!

點知

個電飯㷛跳左兩三次掣就因為個㷛身太熱而罷工(即不斷跳掣。。其實第二次唔夠10分鐘已經跳掣)

就算我攞個㷛膽出嚟浸凍水、等個㷛身攤凍

一放返入去啪掣無幾耐又跳掣。。

搞左好耐

又趕住出門口

見佢焗到6、7成熟(好似d啫喱啱啱凝固又未太實、但又未至於係流質)

又唔可以放入焗爐(一嚟太高身入唔到多士焗爐，二嚟個蛋糕未實反轉唔到)

唔上唔落。。

又唔想嘥野 =.='

電光火石間醒起蒸蛋糕

心諗人地源記清蛋糕都係咁架啦

拿拿聲㷛水用中大火隔水蒸

諗住蒸熟佢就算

結果個蛋糕出到爐

仲幾靚仔tim!

材料:

班蘭蛋糕預拌粉  200g

室溫蛋  4隻

椰漿  90ml

做法:

1.  中速度打發鷄蛋至起泡後再打多30秒，但唔洗企身

2.  逐少加入預拌粉用高速拌勻，再打至厚身、起紋(有清晰紋理、可last得耐，但又未完全企身)

3.  加入椰漿拌勻

4.  電飯㷛膽掃上一層油，倒入麵糊，放入電飯㷛

4a. (理論上)啪掣-＞跳掣-＞等15mins-＞啪掣-＞跳掣-＞等15mins(按需要可啪多次掣)，竹簽插入而comes out clean就ok

4b.  (實際上)啪掣、跳掣、等-＞3次都未得，啪第4次唔夠3分鐘就跳掣，把心一橫煲滾水開中大火隔水蒸15mins

5.  將電飯㷛膽浸一浸冰水(約1分鐘)，同時間用刀輕力圍邊刮起蛋糕(其實一浸冰水個蛋糕已經開始收縮，加上內膽之前已經掃左油，所以用刀貼住邊輕輕轉一圈就脫到模)

後記

想食個班蘭蛋糕啫。。

真係一波三折。。

多士焗爐煮大餐: 咖啡牛奶蛋糕 (簡易版)

鍾意飲咖啡

但好奇怪

一向對咖啡食品興趣不大

更奇怪嘅係

我竟然因為覺得食譜簡單而焗左呢個咖啡蛋糕

可能賣花讚花香

味道出奇地討好~

材料:

蛋白  3隻

蛋黃  3隻

幼砂糖  4tbsp

牛油  35g

牛奶  60g

低筋麵粉  70g

咖啡粉(無糖)  2tsp

做法:

1.  雞蛋回復室溫。牛油隔熱水座溶

2.  蛋黃座暖水稍為打發，加入2tbsp砂糖拌勻，然後倒入牛奶＆牛油溶液

3.  蛋黃漿續座暖水加入咖啡粉拌勻(NOTE 1)，再篩入低粉，輕手拌勻

4.  另一隻無水無油嘅碗打蛋白至起泡泡，分2-3次加入2tbsp砂糖，再打至企身(返轉個碗都唔跌落嚟)

5.  分3次將蛋白霜加入蛋黃漿以切拌方式混合

6.  蛋糕模(NOTE 2)搽上菜油，然後倒入蛋糕糊 

7.  放入已預熱焗爐以180度焗25mins，竹簽插入無粘物為之熟

NOTES:

1.  唔座暖水D咖啡粉溶唔到。但水唔可以太熱，否則煮熟蛋漿

2.  份量=IKEA SATURE & 1個Daiso S size

後記:

又唔Quote原食譜喇。。

因為我唔sure佢敎嘅方法work唔work 

(e.g. 牛油冇講洗唔洗溶、雞蛋冇講洗唔洗回復室溫、室溫蛋點樣溶到咖啡粉(?!)、點解要用水浴法焗一個時間唔長嘅蛋糕(我冇)。。。)

Well..當攞個靈感算喇

多士焗爐煮大餐: 椰香鷄蛋糕

話說
我好鍾意食班蘭蛋糕
一心諗住星期六朝早試下自己焗

點知
唔見左支班蘭香精
於是即刻變陣
班蘭香精換成云尼拿香精
焗左呢個椰香蛋糕。。。

誤打誤撞又幾好食喎～

(原食譜: http://www.christinesrecipes.com/2009/06/pandan-chiffon-cake.html#ixzz315Y1HnNB)

材料

蛋黃麵粉糊：

蛋黃  5隻

幼砂糖 (caster sugar)  20g

椰漿  100ml

云尼拿香精  1tsp

低筋麵粉  100g

菜油  3tbsp

蛋白霜：

蛋白  5隻

幼砂糖  60g

檸檬汁  1tsp

做法：

1.  用打蛋器(Whisk)將蛋黃打散，加入20g幼砂糖打勻。倒入椰漿&云尼拿香精攪勻。

2.  分2-3次篩入低筋粉，用切拌方式輕手混合。最後加入菜油拌勻備用。

3.  用另一大盤 (乾凈、無水份&油份)，用電動打蛋器打發蛋白至起泡。分3次加入60g糖打至企身。最後加入檸檬汁拌勻。

4.  分3次將蛋白加入麵粉糊，用切拌方式輕手混合。

5.  倒入蛋糕模 (4個Daiso S size)，放入已預熱170度焗爐中，先焗15mins，然後調低溫度至150度焗15mins。有需要焗多3-5mins，直至熟透。

6.  待完全冷卻後，切件享用~

多士焗爐煮大餐: 一人份蜂蜜瑪德蓮蛋糕

話說
上星期我做左太多甜品
令自己肥左一個圈
所以我同自己講
喺我未減返之前
我唔會做甜品。。。住

言猶在耳
星期六閒賦在家
硬係覺得唔煮D野就好似嘥左個星期六咁
索性睇下喺台灣買返嚟本"一人份甜點"
加上有好同事送我一包鬆餅粉
研究下有咩可以整都好~

材料:
蛋  1隻(室溫)
蜂蜜  2tbsp
檸檬汁  2tsp
鬆餅粉  55g
牛油  30g

做法:
1.  牛油座滾水熱溶
2.  打發鷄蛋，依次加入蜂蜜、檸檬汁、鬆餅粉。拌勻至無粉粒
3.  加入牛油溶液再拌勻
4.  倒入錫紙盤 (NOTE 1)，放入已預熱焗爐，以180度焗30mins。用竹籤插入中間，無黏附物即成。(NOTE 2)

NOTES:
1.  我用DAISO細長方型(SS)錫紙盤 (8個裝)。
2.  EXACT時間要目測。個面已上色但芯未熟可加錫紙以免燶面，或調低溫度。由於每個焗爐有溫差，所以一定要睇實個火。第一次焗完就知下次個火同時間!

多士焗爐煮大餐: 伯爵茶蛋糕

趁住放假

整一個一直好想試嘅蛋糕: 伯爵茶蛋糕

原食譜係整小蛋糕
(http://www.moonmoonkitchen.com/2013/07/blog-post.html)
但我地做早餐就唔洗用咁多即棄包裝LA~

材料:
雞蛋  2隻

砂糖  1tbsp

蜜糖  2tbsp

低筋粉  70g

伯爵紅茶葉  1包

伯爵茶  25ml

(即伯爵茶包共2包)

無鹽牛油溶液  40g

做法:
1.  牛油座熱水溶化備用。

2.  用一包伯爵茶包以50ml熱水泡浸備用。
3.  雞蛋打入大碗，加砂糖&蜜糖用高速打發至淡黃色而膨脹 (蛋漿滴落嚟有明顯摺痕)。
4.  一次過篩入低筋麵粉，然後放入一整包茶葉，用切拌方式輕手混合。

5.  再加入一半伯爵茶(25ml)&牛油溶液，以切拌方式輕手混合。

6.  倒入焗盤，輕敲台面兩三下。
7.  放入已預熱焗爐，用170度焗約25分鐘。(NOTE 1) 用竹籤插入中間，無黏附物即成。

NOTES:

1.  如果途中見到個面已經上色，可以調低溫度 (e.g. 150度)

多士焗爐煮大餐: 皇室朱古力蛋糕

to celebrate the advent of Easter Holiday

食完飯之後就心思思想焗蛋糕

但時間上又唔許可做一個太複雜嘅
所以就決定整呢個好有霸氣嘅蛋糕 -- 皇室朱古力蛋糕

網上睇到呢個食譜
話係以前英國皇室專享嘅蛋糕
老實講我無深究佢嘅由來
純粹見到所需材料真係好簡單 XDD

材料:
蛋  3隻
朱古力 160g (NOTE 1)

做法:
1.  先將朱古力隔滾水座溶 (NOTE 2)

2.  蛋黃同蛋白分開
3.  蛋黃稍為打發，然後加入朱古力漿

4.  用電動打蛋器高速打蛋白至企身 (NOTE 3)
5.  將蛋白分3次加入朱古力蛋黃漿搞勻

6.  之後用170度焗30mins (NOTE 4)，有需要焗多3-5mins (NOTE 5)

NOTES:

1.  我用左3種黑朱古力(70%) 下次可以試下mix milk chocolate

2.  座溶後要離開熱水，否則太熱會煮熟蛋黃

3.  好似沖涼D泡泡咁

4.  中途焗得高左、太近發熱線可以開一開焗爐個門等佢稍稍降溫 (有時唔想加錫紙)

5.  如果見佢中間未熟可以加焗3-5mins

多士焗爐煮大餐: 香蕉蛋糕

SEARCH食譜嘅時候無意中發現有個台灣BLOGGER做蛋糕好叻
試過佢嘅RECIPES都準 (ESP網上有D食譜做左出嚟係兩回事。。。嗰D就唔講喇)
(http://caroleasylife.blogspot.com/)

早排COME ACROSS到呢個香蕉蛋糕RECIPE 
(原食譜: http://caroleasylife.blogspot.com/2014/03/blog-post_3728.html)

其實之前都唔特別好香蕉蛋糕
但見到佢真係好易做
最重要係唔洗加發粉/泡打粉
於是就跟住做

出嚟味道非常好
仲做左之後兩日嘅早餐 :)

材料:
蛋  2隻
無鹽牛油  60g
低筋麵粉  100g
細砂糖  50g
香蕉肉  100g (大概一隻)

步驟:
1. 焗盤搽一層薄菜油
2. 無鹽牛油座熱水融化成液體，攤凍 (NOTE 1)
3. 雞蛋放入溫熱嘅水(唔洗滾)中浸5-6分鐘 (NOTE 2)
4. 香蕉用叉壓成泥狀

5. 雞蛋放入盆中, 加入細砂糖用打蛋器打散混合均勻
6. 用電動打蛋器高速將全蛋打發
7. 打到蛋糊蓬鬆泛白、拎起打蛋器滴落嚟嘅蛋糊能夠有清楚嘅摺痕就係打好(全程約8-10分鐘)
8. 加入香蕉泥快速混合
9. 低粉過篩，分2次加入，以切拌方式輕手混合均勻 (NOTE 3)

10. 麵糊1/4份量同融化牛油以切拌方式輕手混合均勻 (NOTE 4)

11. 再倒入剩餘麵糊中，以切拌方式輕手混合均勻

12. 完成嘅麵糊倒入焗盤
13. 喺台上輕敲幾下 (目的釋出空氣)
14. 放入已經預熱至170度c嘅焗爐焗12分鐘。之後拎出嚟, 用刀喺蛋糕中間劃一刀, 再放返入焗爐繼續焗30分鐘 (NOTE 5)

15. 時間到用竹籤插入中間，無沾粘即可出爐
16 .完全涼透切成片狀 (NOTE 6)

NOTES:

1. 太熱嘅話之後落蛋會煮熟。。。所以呢個STEP要做先

2. ESP喺雪櫃攞出嚟會有溫差

3. 低粉一定要輕手，攪得太勁個蛋糕出嚟會好實。(衰過兩次。。。)

4. 麵糊加入牛油 (杰=>稀)

5. 中途見佢上哂色就可以加錫紙再焗，否則會燶面

6. 呢個蛋糕唔洗放雪櫃，室溫放三日個TEXTURE都仲好OK~

OTHERS:

個焗盤我喺IKEA買

18CM X 16CM做二人份量嘅蛋糕啱啱好~